2026 йил январ–июн ойларида Ўзбекистонда ишлаб чиқарилган ва сотилган автомобиллар сони 175 минг 374 донани ташкил этди. «Ўзавтосаноат» маълумотларига кўра, энг юқори натижа «UzAuto Motors» ҳиссасига тўғри келиб, компания 81 минг 210 та автомобил сотган.

Иккинчи ўринда 54 минг 862 та автомобил билан «Khorezm Auto» қайд этилган. Кейинги ўринларни «ADM Jizzakh» — 21 минг 743 та, «BYD Uzbekistan Factory» — 17 минг 12 та, «Самарқанд автомобил заводи» — 397 та ва «Asaka Motors» — 150 та автомобил билан эгаллади.

Инфографикага кўра, умумий сотувнинг 46,3 фоизи «UzAuto», 31,3 фоизи «Khorezm Auto», 12,4 фоизи «ADM», 9,7 фоизи «BYD» ҳиссасига тўғри келган.

Брендлар кесимида «Chevrolet» мутлақ етакчилик қилди. Ҳисобот давомида ушбу бренднинг 136 минг 72 та автомобили сотилди. Кейинги ўринларда «BYD» — 17 минг 10 та, «Kia» — 12 минг 286 та, «Chery» — 4 минг 820 та ва «Haval» — 4 минг 402 та автомобил билан қайд этилди.

Автомобиллар сегментлари бўйича эса «Sedan-B» туридаги моделлар энг катта улушни эгаллаб, жами сотувнинг 34,5 фоизини ташкил қилди. «LCV» сегменти улуши 31,4 фоиз, «SUV-B» — 22 фоиз, «SUV-C» — 7 фоиз, «Sedan-C» — 3 фоиз ва «Sedan-D» — 1,1 фоизни ташкил этган.

Моделлар кесимида энг кўп сотилган автомобил «Cobalt» бўлиб, унинг сотуви 40 минг 936 донани ташкил қилди. Кейинги ўринларда «Damas» — 34 минг 286 та, «Tracker» — 20 минг 274 та, «Labo» — 19 минг 723 та ва «Onix» — 19 минг 595 та автомобил билан жойлашди.

Шунингдек, энг оммабоп моделлар қаторидан «Kia Sonet» (9 653 дона), «BYD Song Plus DM-i» (5 630), «BYD Yuan-Up» (4 277), «Chazor Champion» (3 771) ва «Haval M6» (2 095) ҳам ўрин олди.