Бухорода ов милтиғини 4 йил яширган аёлга ҳукм ўқилди. 

Воқеа 2022 йилда бошланган. Ота-онаси даволаниш учун Тошкентга кетган кунларда бобосидан қолган эски уйни буздирган фуқаро Ш.А. ер текисланаётганда, тупроқ орасидан бир қоп чиқиб қолганини ҳайрат билан қаршилаган. Қоп ичида икки бўлак темирга ўхшаган буюмлар бўлган. Кейинчалик уларнинг «Ижевск» қурол заводида ишлаб чиқарилган, 20 калибрли «Иж-5» русумли ов милтиғи эканини аниқлатган.

Ш.А. ўшандаёқ, яшаш хонадонида ҳар қандай қурол борлиги ҳақида тегишли идораларга маълум қилиши кераклиги ҳақида билса ҳам атайин бу ҳақда хабар бермай келган. Уни ўз яшаш уйига олиб кетиб, аввал сомонхонага, кейин эса бошқа жойга яшириб қўйган. Милтиқ, қарийб, тўрт йил давомида рухсатномасиз сақланган.

2025 йилнинг кузида яқин таниши унга бу қуролни расмийлаштириш ёки топшириш кераклигини айтган. Бироқ, аёл бу ишни пайсалга солиб келаверган. Жорий йилда эса ҳуқуқни муҳофаза қилувчи орган ходимларининг ушбу масалада унинг хонадонига келишгани аёлнинг шунча вақт давомида қурол борлиги ҳақида, ҳатто, ўз оиласидагиларни ҳам огоҳлантирмагани ошкор бўлган. У қурол борлигини яширмаган ва ов милтиғини ўзи яшириб қўйгани - ҳашаклар орасидан олиб чиқиб, ихтиёрий равишда топширишга мажбур бўлган.

Тергов давомида тайинланган баллистик экспертиза хулосаси милтиқ ҳақиқатан ҳам ўқотар қурол экани ва ундан ўқ узиш мумкинлигини тасдиқлаган. Судда сўроқ қилинган икки нафар холис ҳам қуролнинг, айнан, Ш.А.томонидан тақдим этилганини тасдиқлаб, кўрсатма берган.

Судланувчи айбига тўлиқ иқрор бўлган. У қуролни сотмаганини, ундан фойдаланмаганини, қилган ишидан чин дилдан пушаймон эканини билдирган. Илгари судланмагани, айбига иқрорлиги ва оилавий шароити суд томонидан жазони енгиллаштирувчи ҳолат сифатида баҳоланган.

«Қонун олдида қуролдан фойдаланилгани ёки йўқлиги эмас, уни қонунга хилоф равишда сақлашнинг ўзи ҳам жиноят ҳисобланади. Топилган ўқотар қуролни тегишли идораларга топширмаслик жиноий жавобгарликка сабаб бўлади»,—дейди Бобораҳим Очилов.

Суд Ш.А.ни Ўзбекистон Республикаси Жиноят кодексининг тегишли моддаларида назарда тутилган жиноятни содир этганликда айбли, деб топди. Унга икки йил муддатга озодликни чеклаш жазоси тайинланди. 

Маълумот ўрнида: Ашёвий далил сифатида сақланган «Иж-5» русумли ов милтиғини давлат эгалигига ўтказиш тўғрисида қарор қабул қилинган.