Бухоро вилояти Вобкент туманида чет элда ишлашни уч нафар фарзандидан устун қўйган ота 262 миллион сўм алиментни бирйўла тўлаб берди. У шу йўл билан фарзандлари таъминотидан 5 йилга «қутулганини» маълум қилди. Бу ҳақда «Xabar.uz»га МИБ жамоатчилик билан алоқалар ва ҳуқуқий ахборот бўйича катта инспектори Ихтиёр Олимов маълум қилди.

Таъкидланишича, вобкентлик Р.Ж. ва Ш.Қ. ўртасидаги никоҳ ўзаро келишмовчиликлар сабабли ажрашиш ёқасига келиб қолган. Бу оилада уч нафар вояга етмаган фарзанд бор.

Эр аразлаб, чет элга ишлаш учун чиқиб кетган, аёл эса фарзандлари таъминоти учун эридан алимент ундириш мақсадида судга ариза берган.

Суд қарорига кўра, қарздор Р.Ж.дан ундирувчи Ш.Қ. фойдасига вояга етмаган уч нафар фарзандининг моддий таъминоти учун алимент ундириш белгиланган. Ижро ҳужжати МИБнинг Вобкент тумани бўлими иш юритувига келиб тушгач, ижро ҳаракатларига киришилган.

Жараёнда қарздорнинг ишлаш учун чет элга чиқиб кетгани аниқланди. Бироқ ота келгусида алимент қарздорлиги сабабли четга чиқишига чеклов қўйилишининг олдини олиш мақсадида 2026 йил 1 февралдан 2031 йил 1 февралгача бўлган 5 йиллик давр учун алимент пулларини олдиндан тўлашни афзал билди. Шу тариқа, у бирйўла бу ташвишдан «қутулишини» маълум қилди.

«Қонун ўз ишини қилди, ижро таъминланди. Ота 261 891 502 сўм алимент пулларини бирйўла тўлади. Бироқ фарзандларини боқишга имкони бўла туриб, 5 йилга улар ташвишидан «қутулдим» деган отага хориж татирмикин? Бу жамиятимиз учун оғриқли саволга айланди», — дейди судда иштирок этган маҳалла фаоли.