2026 йилнинг биринчи ярмида Давлат меҳнат инспекциясига фуқаролардан ўзининг хабарисиз ишга жойлаштирилгани ҳақида 1 495 та мурожаат келиб тушди.

Инспекция томонидан ўтказилган ўрганишлар натижасида ҳозирда фаолият юритаётган 143 та корхона ва ташкилот раҳбарларига нисбатан маъмурий ҳамда жиноий таъсир чоралари қўлланилди. Шунингдек, 56 та корхона ва ташкилотга ёзма кўрсатмалар киритилди.

Текширувлар давомида айрим мурожаатларда қайд этилган корхона ва ташкилотлар фаолияти тугатилгани ҳам маълум бўлди.

Шунингдек, фуқароларнинг меҳнат ҳуқуқларини тиклаш мақсадида 2020–2025 йиллар давомида Ягона миллий меҳнат тизимига (ЯММТ) нотўғри киритилган маълумотлар ўчирилиб, мавжуд муаммолар бартараф этилди.

Давлат меҳнат инспекцияси, ўз навбатида, фуқароларни меҳнат фаолиятига оид маълумотларини мунтазам текшириб боришга чақирди. Агар шахс ўзининг хабарисиз ишга расмийлаштирилганини аниқласа, ваколатли органларга қисқа рақам (1176) ёки  расмий Телеграм бот (@munosibmehnat_bot)га мурожаат қилиши мумкинлиги айтилди.