АҚШнинг Алабама штатида NASAнинг 29 ёшли муҳандис-ядрочиси Жошуа Лебланнинг жасади аниқланди. У қарийб бир йил давомида бедарак йўқолган деб ҳисобланаётган эди.

New York Post нашри маълумотларига кўра, мутахассиснинг ўлими 2025 йил 22 июл куни Ҳантсвиллда юз берган. Лебланнинг оиласи унинг йўқолгани ҳақида ўша куни эрталаб тегишли органларга хабар берган: муҳандис алоқага чиқмаган ва ишхонасига бормаган. Қариндошлари унинг ўғирлаб кетилганини тахмин қилишган эди.

Хабарга кўра, Леблан Tesla электромобили тўсиқ ва дарахтга урилиши оқибатидаги ёнғинда ҳалок бўлган. Алабама суд-тиббиёт фанлари департаменти ҳалок бўлган шахснинг кимлигига орадан уч кун ўтиб аниқлик киритган. Орадан шунча вақт ўтиб, қариндошлари Леблан ушбу автомобилда бўлган бўлиши мумкинлигини тасдиқлашди.

Жошуа Леблан NASAда ишлаётганига беш ярим йилдан ошганди. У космик ядровий двигателлар, жумладан, DRACO лойиҳаси учун бошқарув тизимларини ишлаб чиқувчи гуруҳ раҳбари эди. Нашр қайд этишича, Лебланнинг ўлими — ядро фани ва космик тадқиқотлар соҳасида ишлаган бошқа олимларнинг ўлими ва йўқолиши билан боғлиқ ҳолат бўлиши мумкин.

Қайд этиш жоизки, сўнгги икки йил ичида НУЖ (номаълум учувчи жисмлар)ни тадқиқ қилган, шунингдек, ядровий тадқиқотлар соҳасида фаолият юритган 10 нафар олим ўлган ёки бедарак йўқолган. Яқинда 11-қурбон аниқланди, у 2022 йилда ҳалок бўлган эди. Мана энди ҳалок бўлган, ўлдирилган ёки бедарак йўқолган америкалик ядрочилар ва фазовий соҳа олимлари рўйхатига Жошуа Леблан номи ҳам қўшилди.