Ukraina Prezidenti devoni rahbari Andrey Yermak korrupsiya mojarosi fonida iste’foga chiqdi. Bu haqda Ukraina Prezidenti Vladimir Zelenskiy videomurojaatda e’lon qildi.

«Ukraina Prezidenti devoni faoliyati qayta ishga tushiriladi. Devon rahbari Andrey Yermak iste’foga chiqdi... Men hech qanday mish-mishlar yoki taxminlar bo‘lmasligini istayman. Devonning yangi rahbari haqida ertaga men ushbu muassasani boshqarishi mumkin bo‘lgan shaxslar bilan maslahatlashuvlar o‘tkazaman», dedi Zelenskiy.

Uning qo‘shimcha qilishicha, Ukrainadan Qo‘shma Shtatlar bilan muzokaralarda Qurolli Kuchlar Bosh shtabi boshlig‘i Andriy Gnatov va Milliy xavfsizlik va mudofaa kengashi kotibi Rustem Umerov vakil bo‘ladi. 

Zelenskiy Yermakni ishdan bo‘shatish to‘g‘risidagi farmonni imzolagan. 

 Eslatib o‘tamiz, bugun Milliy Korrupsiyaga Qarshi Byuro (NABU) va Ukraina Ixtisoslashtirilgan Korrupsiyaga Qarshi Prokuraturasi (SAPO) Yermakning kvartirasida tintuv o‘tkazdi. Ukraina prezidenti devoni rahbari o‘zining Telegram kanalida tergovga to‘sqinlik qilmaganini yozdi.«Ularga kvartiraga to‘liq kirish imkoniyati berildi va mening advokatlarim voqea joyida, huquqni muhofaza qilish organlari bilan hamkorlik qilmoqda. Men to‘liq hamkorlikni ta’minlayapman», deb qo‘shimcha qildi Yermak. 

So‘nggi paytlarda Ukraina siyosiy doiralarida korrupsion mojaro avj oldi. Zelenskiyning yaqin odamlaridan biri Timur Mindich xorijga qochishi ortidan vaziyat keskinlashdi.