Ukraina prezidenti devoni rahbari Andrey Yermak juma kuni uyida korrupsiyaga qarshi idora tomonidan o‘tkazilgan reyd ortidan istefo berdi va frontga yo‘l olmoqchi ekanini bildirdi. «NYP» Yermakning bu haqdagi maktubini e’lon qildi.

Yermak o‘zining qarorini izohlar ekan: «Men frontga ketyapman va har qanday oqibatlarga tayyorman. Men halol va vijdonli insonman», — deb yozgan. U endi telefon qo‘ng‘iroqlariga javob berolmasligi mumkinligini ham qo‘shimcha qilgan.

Uning ta’kidlashicha, tintuv uning sha’niga putur yetkazgan va himoyasiz qoldirgan.

«Meni haqorat qilishdi va mening qadr-qimmatim himoya qilinmadi, garchi men 2022 yil 24 fevraldan beri Kiyevda bo‘lsam ham. Men Zelenskiyga muammo tug‘dirishni xohlamayman, shuning uchun frontga ketaman. Menga qarshi to‘qilayotgan bo‘htonlar meni g‘azablantirdi, ammo haqiqatni biladiganlarning qo‘llab-quvvatlamasligi bundan ham ko‘proq g‘azabimni keltiradi», — degan Yermak.

Juma kuni Ukraina Milliy antikorrupsiya byurosi Yermakning xonadonda tintuv o‘tkazdi. Reyd 15 oy davom etgan «Operatsiya Midas» jaryonidagi tergov bilan bog‘liq. Tergovchilar Energoatom bilan ishlagan pudratchilardan 10–15 foiz miqdorida pora talab qilingan yirik sxema aniqlanganini, jami qariyb 100 million dollar «o‘g‘irlanganini» aytishmoqda.

Yermakning o‘ziga nisbatan ayblov qo‘yilmagan, Ukraina rasmiy idoralari «uyda tintuv bo‘lgani, ammo protsessual harakatlar yuritilmagani»ni bildirgan.

Yermak Ukraina delegatsiyasining AQSh bilan Ukraina tinchlik rejasi bo‘yicha muzokaralarini boshqarib kelayotgan eng muhim shaxslardan biri edi. Uning iste’fosi AQSh delegatsiyasi bilan navbatdagi uchrashuv oldidan e’lon qilindi.

Zelenskiy iste’foni qo‘llab-quvvatlab, Yermakning ishi hamisha «vatanparvarlik tutumi»da bo‘lganini ta’kidladi.

«Har qanday mish-mishlar va taxminlarni bartaraf etish uchun u iste’fo berdi», — dedi Zelenskiy.

AQSh bilan muzokaralar delegatsiyasi tarkibi qayta shakllantirilmoqda. Muzokaralarda asosiy rollardan birini Ukraina Xavfsizlik va mudofaa kengashi kotibi Rustem Umerov saqlab qolgan. Uning tinchlik rejasiga oid dastlabki kelishuvga tayyorligi borasida AQSh matbuotida tortishuvlar paydo bo‘lgan.

Yermak frontga qanday va qachon jo‘nashini aytmagan. U qurolli kuchlarga qo‘shiladimi — bu ham noma’lum. Ammo uning ketishi Ukraina–AQSh tinchlik muzokaralarining eng murakkab bosqichida ichki siyosiy bosimlar kuchayganini ko‘rsatadi.

«Balki yana ko‘risharmiz. Ukrainaga shon-sharaflar!» – deb tugatgan Yermak o‘z maktubini.