AQSh 19 ta «xafv soluvchi» davlat fuqarolarining grin-kartalarini qayta ko‘rib chiqadi: Tramp «uchinchi dunyo mamlakatlaridan migratsiyani to‘xtatish»ni va’da qildi

AQSh hukumati 19 ta «xavf yuqori» bo‘lgan mamlakatdan kelgan muhojirlarning grin-kartalarini to‘liq va har tomonlama qayta tekshirishni boshladi. Bu haqda «Meduza» nashri AQSh Fuqarolik va migratsiya xizmati (USCIS) rahbari Jozef Edlouga tayanib ma’lum qilmoqda.

Jozef Edlouga ko‘ra, prezident Donald Tramp unga «har bir xavfli deb topilgan davlatdan kelgan grin-karta egalarining hujjatlarini qaytadan to‘liq tekshirish» bo‘yicha topshiriq bergan.

USCIS ma’lumotiga ko‘ra, ro‘yxat prezident Trampning iyun oyidagi farmoniga asoslangan. Unda mamlakatlar terrorizm bilan bog‘liq xavf va milliy xavfsizlikka tahdid darajasiga ko‘ra toifalarga ajratilgan edi.

Eng «xavfli» toifadagi 12 davlat, jumladan:

• Afg‘oniston
• Gaiti
• Eron
• Liviya
• Yaman
• va boshqalar

Ushbu mamlakatlar fuqarolarining Qo‘shma Shtatlarga kirishi mulaqo cheklangan.

Cheklovlar qisman qo‘llaniladigan yana 7 davlat:

• Togo
• Turkmaniston
• Venesuela
• va boshqalar

Eng muhim jihati ushbu ro‘yxatga Rossiya va Belarus kiritilmagan.

Shu tariqa, jami 19 davlat fuqarolarining grin-kartalari qayta ko‘rib chiqiladi.

Prezident Donald Tramp ushbu tekshiruvlar fonida yanada qattiqroq siyosat yo‘lini e’lon qildi. Uning so‘zlariga ko‘ra, AQSh «uchinchi dunyo mamlakatlaridan migratsiyani abadiy to‘xtatishi kerak».

«Bu Amerikaning migratsiya tizimini «to‘liq tiklash» uchun zarur», – deydi u.

Shuningdek, Tramp «ma’muriyatga foyda keltirmaydigan har bir migrantni deportatsiya qilish» niyatini bildirdi.

Trampning Oq uyga qaytishidan keyin AQShda migratsiya siyosati sezilarli darajada keskinlashdi. Hukumat ayni paytda chegara nazoratini kuchaytiryapti, noqonuniy migrantlarga nisbatan jazoni og‘irlashtiryapti hamda doimiy yashash huquqi (grin-karta) va qochqin maqomidagilar uchun talablarni qat’iylashtirmoqda.

19 mamlakat bo‘yicha boshlangan ommaviy tekshiruv esa so‘nggi yillardagi eng yirik migratsion tekshiruvlardan biri bo‘lishi kutilyapti.