Jahonning yetakchi xalqaro ommaviy axborot vositalari — CNN, Forbes, The Wall Street Journal, The Economist, Arab News va China Daily kabi nashrlar O‘zbekistondagi Islom sivilizatsiyasi markazini «global miqyosdagi megaloyiha», «Markaziy Osiyoning durdonasi» hamda «islom sivilizatsiyasiga zamonaviy qarashni shakllantiradigan makon» sifatida baholamoqda.

O‘zbekistonda Islom sivilizatsiyasi markazining ochilishi xalqaro jamoatchilikda katta qiziqish uyg‘otdi va jahon OAV diqqat markaziga aylandi. Markaz haqidagi materiallar 20 dan ortiq davlatda va 7 tilda — ingliz, arab, ispan, xitoy, hind, turk va rus tillarida chop etildi. Ularning umumiy auditoriyasi 1,5 milliarddan ortiq insonni qamrab oldi. Materiallar xalqaro jurnalistlar, tahlilchilar va ekspertlar tomonidan tayyorlangan bo‘lib, bu loyihaga nisbatan global professional hamjamiyatning yuqori qiziqishini ko‘rsatadi.

Xalqaro OAV ushbu voqeaning ramziy ahamiyatiga ham alohida e’tibor qaratadi. Arab News ta’kidlashicha, «O‘zbekiston Prezidenti tashabbusi bilan amalga oshirilgan Markazning ochilishi muqaddas Ramazon oyiga to‘g‘ri kelgani, xuddi sakkiz yil avval birinchi tamal toshi qo‘yilgani kabi, unga alohida tarixiy-ruhiy izchillik bag‘ishlaydi». Khaleej Times esa Markazni «ilg‘or texnologiyalar va zamonaviy ilmiy yondashuvlar uyg‘unlashgan noyob makon» sifatida ta’riflaydi.

Forbes qayd etishicha, «Prezident Shavkat Mirziyoyev rahbarligida mamlakat barqaror rivojlanish va iqtisodiy ochiqlik strategiyasini amalga oshirmoqda». Shu bilan birga, geosiyosiy ziddiyatlar va madaniy identifikatsiya atrofidagi bahslar kuchayib borayotgan sharoitda Islom sivilizatsiyasi markazi «sivilizatsion merosni zamonaviy “yumshoq kuch” vositasiga aylantirmoqda». The Wall Street Journal esa Markaz «boy tarixiy merosni birlashtirish» vazifasini bajarayotganini ta’kidlaydi.

China Daily Markazni «O‘zbekistonning muhim madaniy-ilmiy loyihalaridan biri» deb atab, uning O‘zbekiston va Xitoy o‘rtasidagi madaniy-gumanitar hamkorlikni mustahkamlashdagi o‘rniga e’tibor qaratgan. The Korea Times esa majmua «islom sivilizatsiyasining insonparvar va ma’rifiy mohiyatini aks ettiradi» hamda «madaniy muloqot va ilmiy hamkorlik uchun zamonaviy maydon» ekanini qayd etgan.

Euronews Markazni ilmiy tadqiqotlar, ta’lim va zamonaviy ko‘rgazma amaliyotlarini birlashtirgan «yangi meros va tadqiqotlar xabi» sifatida baholaydi. Ispaniyaning ABC nashri esa «O‘zbekiston Buyuk Ipak yo‘li merosini qayta tiklamoqda», deya loyihani mintaqaning tarixiy sivilizatsion almashinuv markazi sifatidagi o‘rni bilan bog‘laydi.

Vengriyaning Hello Magyar nashri ta’kidlashicha, «majmua arxitekturasi nafaqat ulkanligi, balki zamonaviy shaharsozlik va ekologik barqarorlik standartlariga to‘liq mosligi bilan ham hayratlantiradi». Turkiyaning Yeni Konya nashri esa Markazni «so‘nggi asrdagi eng muhim tarixiy, madaniy va badiiy yutuqlardan biri sifatida baholash mumkin bo‘lgan ulkan va salobatli majmua» deb atagan.

Ozarbayjonning Caliber.az nashrida esa Islom sivilizatsiyasi markazi «Ginnes rekordlar kitobiga nomzod» sifatida qayd etilgani uning ko‘lami va noyobligini yana bir bor tasdiqlaydi.

Islom sivilizatsiyasi markazi shunchaki yangi muzey emas, balki kengroq ma’noda — mamlakatlar o‘z merosini qayta kashf etayotgan va uni dunyoga tushunarli qilib taqdim etayotgan tarixning bir qismiga aylanmoqda. Bugun Markaz allaqachon tashrif buyuruvchilar uchun ochiq. Ekspertlar uning madaniy turizmni rivojlantirishdagi ulkan salohiyatini ham ta’kidlamoqda. Yangi majmua O‘zbekistonni noyob tarixiy va intellektual merosga ega manzil sifatida yanada jozibador qiladi. Biroq jahon matbuoti e’tiboridan kelib chiqib aytish mumkinki, uning ahamiyati turizm doirasidan ancha kengdir.

Xalqaro OAVning baholari: