Putin Bishkekda bo‘lib o‘tgan KXShT sammitida tashkilotning harbiy qudratini yangi bosqichga olib chiqish niyatini bildirdi. Uning ta’kidlashicha, Moskva KXShTni NATOga nisbatan muvozanatni saqlaydigan kuchli xavfsizlik blokiga aylantirishni maqsad qilgan.

Putin sammitda «kollektiv kuchlarni zamonaviy rus qurol-aslahalari bilan keng ko‘lamda qayta jihozlash» taklifini ilgari surdi. Uning so‘zlariga ko‘ra, Ukrainadagi urushda qo‘llanilib, samarasi isbotlangan harbiy texnika a’zo davlatlar kontingentlariga ham yetkazilishi kerak. Shu bilan birga, KXShTga kiruvchi mamlakatlarning milliy harbiy bo‘linmalari jangovar tayyorgarligini oshirish asosiy vazifalardan biri ekanini qayd etdi.

KXShT – Rossiya tomonidan geosiyosiy ta’sir vositasi sifatida ko‘riladigan harbiy-siyosiy blok bo‘lib, 2025 yil noyabr holatiga ko‘ra, unga Rossiya, Belarus, Qozog‘iston, Qirg‘iziston, Tojikiston va formal ravishda Armaniston kiradi. Armaniston hukumatining ittifoqdan siyosiy masofalanishiga qaramay, uning a’zoligi hali rasman to‘xtatilmagan.

Putinning ta’kidlashicha, a’zo davlatlar harbiy-sanoat korxonalarining hamkorligi kengaytiriladi, shuningdek, bir qator qo‘shma harbiy mashg‘ulotlar o‘tkaziladi.

«Bild» nashrining harbiy sharhlovchisi Yulian Ryopke fikriga ko‘ra, Moskva KXShTni faqat mudofaa tuzilmasi sifatida emas, balki «zarurat tug‘ilganda NATOga qarshi to‘g‘ridan-to‘g‘ri harbiy yordam ko‘rsata oladigan blok» sifatida shakllantirmoqda. 

Ekspertlar fikricha, Rossiyaning bunday qadamlari u NATO bilan qarama-qarshilikni kuchaytirishga tayyorlanayotganidan va o‘z ittifoqchilari orqali mintaqadagi harbiy ta’sirini mustahkamlashga intilayotganidan dalolat beradi.