OpenAI 13–17 yoshli o‘smirlar uchun maxsus moslashtirilgan «ChatGPT for Teens» versiyasini ishga tushirdi. Yangi versiyada o‘smirlarning yoshi va ehtiyojlariga mos xavfsizlik choralari kuchaytirilgan.

Yangi tizimda o‘z joniga qasd qilish, o‘zini o‘zi jarohatlash, shuningdek romantik yoki axloqsiz mazmundagi muloqotlarga nisbatan qo‘shimcha cheklovlar joriy etilgan.

OpenAI ma’lum qilishicha, maqsad o‘smirlarni sun’iy intellektdan xavfsiz va yoshiga mos tarzda foydalanishga yo‘naltirishdir. Kompaniya vakillari o‘smirlarga bolalardek munosabatda bo‘lmasdan, ularni yoshiga mos bo‘lmagan materiallardan himoya qilish zarurligini ta’kidlagan.

Shuningdek, o‘smirlar bilan muloqotda chatbot o‘zini shaxsiy his-tuyg‘ulari bordek ko‘rsatishi yoki ongli ekanini anglatishi mumkin emas.

Ota-onalar farzandining bog‘langan akkaunti orqali «tinch soatlar»ni belgilashi mumkin. Bu vaqtda o‘smir ChatGPT’dan foydalana olmaydi.

Yuqori xavfli ayrim holatlarda, jumladan, foydalanuvchi o‘zini jarohatlashi ehtimoli mavjud bo‘lganda, ota-onalarga xavfsizlik bildirishnomalari yuboriladi. Ovqatlanish bilan bog‘liq buzilishlar bo‘yicha ham qo‘shimcha ogohlantirishlar joriy etilmoqda.

Ota-ona nazoratidan foydalanish uchun o‘smir va uning ota-onasi yoki vasiysi tizimga alohida rozilik berishi kerak. Biroq OpenAI ta’kidlashicha, maqsad nazorat vositalari yoqilmagan holatda ham tizimni xavfsiz qilishdan iborat.

Kompaniya foydalanuvchilarning yoshini to‘g‘ridan-to‘g‘ri tasdiqlamaydi. Tizim so‘rovlar xususiyati kabi ma’lumotlar asosida foydalanuvchi 18 yoshdan kichik bo‘lishi mumkinligini baholaydi va voyaga yetmagan deb topilgan shaxsni o‘smirlar versiyasiga o‘tkazadi.

«ChatGPT for Teens» uy vazifalari va o‘qishda yordam berish uchun ham moslashtirilgan. Uning asosiy yondashuvi tayyor javob yoki inshoni taqdim etish emas, balki o‘quvchini mustaqil ravishda yechim topishga yo‘naltirishdan iborat. Bu yondashuv o‘smirlarning sun’iy intellektdan faqat tayyor javob olish uchun emas, bilim va ko‘nikmalarini rivojlantirish vositasi sifatida foydalanishini ko‘zlaydi.