Украина Президенти девони раҳбари Андрей Ермак коррупция можароси фонида истеъфога чиқди. Бу ҳақда Украина Президенти Владимир Зеленский видеомурожаатда эълон қилди.

«Украина Президенти девони фаолияти қайта ишга туширилади. Девон раҳбари Андрей Ермак истеъфога чиқди... Мен ҳеч қандай миш-мишлар ёки тахминлар бўлмаслигини истайман. Девоннинг янги раҳбари ҳақида эртага мен ушбу муассасани бошқариши мумкин бўлган шахслар билан маслаҳатлашувлар ўтказаман», деди Зеленский.

Унинг қўшимча қилишича, Украинадан Қўшма Штатлар билан музокараларда Қуролли Кучлар Бош штаби бошлиғи Андрий Гнатов ва Миллий хавфсизлик ва мудофаа кенгаши котиби Рустем Умеров вакил бўлади. 

Зеленский Ермакни ишдан бўшатиш тўғрисидаги фармонни имзолаган. 

 Эслатиб ўтамиз, бугун Миллий Коррупцияга Қарши Бюро (НАБУ) ва Украина Ихтисослаштирилган Коррупцияга Қарши Прокуратураси (САПО) Ермакнинг квартирасида тинтув ўтказди. Украина президенти девони раҳбари ўзининг Телеграм каналида терговга тўсқинлик қилмаганини ёзди.«Уларга квартирага тўлиқ кириш имконияти берилди ва менинг адвокатларим воқеа жойида, ҳуқуқни муҳофаза қилиш органлари билан ҳамкорлик қилмоқда. Мен тўлиқ ҳамкорликни таъминлаяпман», деб қўшимча қилди Ермак. 

Сўнгги пайтларда Украина сиёсий доираларида коррупцион можаро авж олди. Зеленскийнинг яқин одамларидан бири Тимур Миндич хорижга қочиши ортидан вазият кескинлашди.