The New York Times нашрида эълон қилинган суриштирув Эроннинг собиқ президенти Маҳмуд Аҳмадинажод атрофидаги энг шов-шувли даъволардан бирини ўртага чиқарди. Нашрнинг ёзишича, Исроилнинг ташқи разведка хизмати — Mossad бир неча йил давомида Аҳмадинажод билан алоқа ўрнатишга уринган ва уни Эронда эҳтимолий сиёсий ўзгаришлардан кейинги раҳбар сифатида кўрган. Бу даъволар ҳозирча мустақил тасдиғини топмаган, Аҳмадинажод томони эса уларни тўлиқ рад этган.

Нашр маълумотига кўра, 2024 йилда Венгриядаги Людовика Давлат хизмати университетида ўтказилган иқлим конференцияси аслида Маҳмуд Аҳмадинажоднинг Исроил разведкаси вакиллари билан яширин мулоқот қилиши учун ташкил этилган. Университет ректори Гергей Делига юқори лавозимли ҳукумат амалдори ушбу тадбирни ташкил этиш бўйича мурожаат қилган. Ректорнинг айтишича, унга конференция фақат расмий кўриниш учун ўтказилаётгани тушунтирилган.

Манбаларнинг иддао қилишича, Аҳмадинажод 2024 ва 2025 йилларда Будапештга икки марта ташриф буюрган ва шу сафарлар чоғида Mossad вакиллари билан учрашган. Ҳатто ўша пайтда Mossad раҳбари бўлган Давид Барнеанинг шахсан Будапештга келгани ҳам қайд этилган.

The New York Times суриштирувига кўра, Исроил Эронда ҳокимият алмашиши юз берган тақдирда Аҳмадинажодни янги сиёсий етакчи сифатида илгари суриш режасини ишлаб чиққан.

Нашрнинг ёзишича, сўнгги йилларда Аҳмадинажодга турар жой ва хорижий сафарлари учун маблағ ажратилган, шунингдек, у хорижда бир неча марта махфий учрашувларда иштирок этган. Суриштирувда келтирилишича, 2026 йил февраль ойида АҚШ–Исроил ва Эрон ўртасидаги ҳарбий тўқнашувлар бошланган пайтда Аҳмадинажодни Теҳрондан олиб чиқиш бўйича махсус операция ҳам режалаштирилган. Бунинг учун унинг қароргоҳи яқинига берилган авиазарбадан кейин Mossad агентлари бошқараётгани айтилган автомобилда хавфсиз жойга олиб кетилгани иддао қилинмоқда. Бироқ режа амалга ошмай қолган.

Суриштирувда Аҳмадинажоднинг президентликдан кетганидан кейинги сиёсий қиёфаси ҳам таҳлил қилинган. Нашр таъкидлашича, у аввалги кескин антиисроил баёнотларини деярли тўхтатган, ташқи кўринишини ўзгартирган, инглиз тилини ўрганган, халқ билан очиқ мулоқотларга кўпроқ эътибор қарата бошлаган ҳамда Эрондаги коррупция ва хавфсизлик идоралари фаолиятини танқид қилган. Шу билан бирга, унинг мамлакат раҳбарлигига қайтиш истаги сақланиб қолгани, атрофидагиларга Эрон келажагида муҳим сиёсий роль ўйнаши мумкинлигини айтгани ҳам келтирилади.

Аҳмадинажод барча даъволарни рад этмоқда

Нашр эълон қилинганидан сўнг Маҳмуд Аҳмадинажод матбуот хизмати расмий баёнот билан чиқиб, The New York Times келтирган барча маълумотларни «мутлақо ёлғон» деб атади. Унинг идораси Аҳмадинажоднинг уй қамоғида экани, Mossad билан ҳамкорлик қилгани ёки Исроил томонидан қўллаб-қувватлангани ҳақидаги даъволар ҳақиқатга тўғри келмаслигини билдирди.

Шу тариқа, ҳозирча мазкур суриштирувда келтирилган иддаолар мустақил манбалар томонидан тасдиқланмаган. Бироқ материал Эрон, Исроил ва минтақадаги геосиёсий жараёнлар ҳақидаги баҳсларни янада кучайтирди.