Путин Бишкекда бўлиб ўтган КХШТ саммитида ташкилотнинг ҳарбий қудратини янги босқичга олиб чиқиш ниятини билдирди. Унинг таъкидлашича, Москва КХШТни НАТОга нисбатан мувозанатни сақлайдиган кучли хавфсизлик блокига айлантиришни мақсад қилган.

Путин саммитда «коллектив кучларни замонавий рус қурол-аслаҳалари билан кенг кўламда қайта жиҳозлаш» таклифини илгари сурди. Унинг сўзларига кўра, Украинадаги урушда қўлланилиб, самараси исботланган ҳарбий техника аъзо давлатлар контингентларига ҳам етказилиши керак. Шу билан бирга, КХШТга кирувчи мамлакатларнинг миллий ҳарбий бўлинмалари жанговар тайёргарлигини ошириш асосий вазифалардан бири эканини қайд этди.

КХШТ – Россия томонидан геосиёсий таъсир воситаси сифатида кўриладиган ҳарбий-сиёсий блок бўлиб, 2025 йил ноябрь ҳолатига кўра, унга Россия, Беларусь, Қозоғистон, Қирғизистон, Тожикистон ва формал равишда Арманистон киради. Арманистон ҳукуматининг иттифоқдан сиёсий масофаланишига қарамай, унинг аъзолиги ҳали расман тўхтатилмаган.

Путиннинг таъкидлашича, аъзо давлатлар ҳарбий-саноат корхоналарининг ҳамкорлиги кенгайтирилади, шунингдек, бир қатор қўшма ҳарбий машғулотлар ўтказилади.

«Bild» нашрининг ҳарбий шарҳловчиси Юлиан Рёпке фикрига кўра, Москва КХШТни фақат мудофаа тузилмаси сифатида эмас, балки «зарурат туғилганда НАТОга қарши тўғридан-тўғри ҳарбий ёрдам кўрсата оладиган блок» сифатида шакллантирмоқда. 

Экспертлар фикрича, Россиянинг бундай қадамлари у НАТО билан қарама-қаршиликни кучайтиришга тайёрланаётганидан ва ўз иттифоқчилари орқали минтақадаги ҳарбий таъсирини мустаҳкамлашга интилаётганидан далолат беради.