«Volkswagen» бош директори Оливер Блуме ходимларга юборган ички огоҳлантириш ҳужжатида компания дунё бўйлаб яна 50 мингга яқин иш ўрнини қисқартириши мумкинлигини маълум қилди. Ҳужжат билан «Reuters» ахборот агентлиги танишган.

Қайд этилишича, компания харажатлар бўйича рақобатчилардан тахминан 20 фоиз орқада қолаётгани аниқланган. Шу ҳисоб-китобларга кўра, қўшимча 50 минг иш ўрнини қисқартириш назарий эҳтиёж сифатида баҳоланган.

Бу режа аввал эълон қилинган қисқартиришлардан ташқари ҳисобланади. Илгари «Volkswagen» гуруҳи, жумладан, «Porsche» ва «Audi» бўлинмаларида жами 50 мингта иш ўрни қисқартирилишига келишилган эди.

Оливер Блуме огоҳлантириш ҳужжатида компания ҳозирча барча брендлар, корхоналар ва минтақалар кесимида қанча қисқартириш ҳақиқатда зарур ва амалга ошириш мумкинлигини баҳолаётганини билдирган.

Унинг таъкидлашича, 50 минг иш ўрни ҳақидаги рақам амалий қарор эмас, балки харажатлар бўйича рақобатбардошликни тиклаш учун қилинган назарий ҳисоб-китоб ҳисобланади. Компания ҳар бир бўлинма бўйича эҳтиёжни алоҳида таҳлил қилиб, кейинги қарорларни қабул қилишини маълум қилган.

Эслатиб ўтамиз, аввалроқ компания 100 минг иш ўрнини қисқартиришни режалаштираётгани ҳақида хабар бергандик.