Олий Мажлис Қонунчилик палатаси мажлисида Ички ишлар вазирининг автомобиль йўлларидаги фото ва видео қайд этиш қурилмаларининг самарадорлиги ҳамда йўл ҳаракати соҳасига ахборот технологияларини жорий этиш ишларига оид парламент сўровига жавоби кўриб чиқилди.

Маълум қилинишича, ҳозирги кунда республика бўйича 5 425 та фото ва видео қайд этиш техника воситалари ўрнатилган. Уларни жойлаштиришда йўл-транспорт ҳодисалари таҳлили, ҳаракат интенсивлиги, йўл инфратузилмаси ҳолати ва аҳоли мурожаатлари инобатга олинган.

Вазирлик маълумотига кўра, 2022–2025 йилларда йўл чизиқларини чизиш, техник воситалар ўрнатиш ва инфратузилмани ривожлантиришга 978,3 миллиард сўм маблағ йўналтирилган.

Бу даврда 78 844 та янги йўл белгиси ўрнатилган, 49 380 та белги янгисига алмаштирилган ҳамда 1 081 та светофор объекти янгидан қурилган.

Парламент сўрови депутатларнинг ҳудудларда аҳоли билан учрашувлари давомида келиб тушган мурожаатлар асосида юборилган. Хусусан, фуқаролар кўчма фоторaдарлар фаолияти, сунъий йўл нотекисликлари ва йўллардаги баъзи чекловлар юзасидан эътироз билдирган.

Шундан сўнг, йўлларда ўтказилган хатловлар натижасида 132 та ҳаракатни чекловчи белги ва 202 та тўхташ ҳамда тўхтаб туриш белгиси олиб ташланган.

Бундан ташқари, йўлларда ноқонуний ўрнатилган 203 та турли тўсиқ ва 308 та сунъий нотекислик бартараф этилгани маълум қилинди.

Вазирлик ҳисоботига кўра, мазкур чоралар натижасида жорий йилнинг дастлабки тўрт ойида йўл-транспорт ҳодисалари 17,7 фоизга камайган.

Мажлисда мазкур йўналиш бўйича тизимли парламент назорати олиб борилиши қайд этилди. Ички ишлар вазирининг жавоби эса маълумот учун қабул қилинди.