2026 йилнинг январ–июн ойларида Ўзбекистон бўйича жами 185 минг 570 нафар киши доимий яшаш жойини ўзгартириб, бошқа ҳудудларга ёки мамлакатга кўчиб келган. Шу билан бирга, ушбу даврда 189 минг 343 нафар фуқаро бошқа ҳудудларга ёки хорижга кўчиб кетган.

Маълумотларга кўра, кўчиб келганларнинг 183 минг 921 нафари республика ичидаги ички миграция ҳисобига тўғри келган. Хорижий давлатлардан доимий яшаш учун келганлар сони эса 1 минг 649 нафарни ташкил этган.

Кўчиб кетганларнинг 183 минг 921 нафари мамлакат ичидаги бошқа ҳудудларга жойлашган бўлса, 5 минг 422 нафар фуқаро хорижий давлатларга кўчиб кетган.

Ҳисоботга кўра, энг кўп кўчиб келганлар Тошкент шаҳри ҳиссасига тўғри келди. Пойтахтга олти ойда 64 минг 500 нафар келган бўлиб, шундан 1 минг 89 нафари хорижий давлатлардан кўчиб келган.

Кейинги ўринларда Тошкент вилояти 27 минг 131 нафар, Фарғона вилояти 10 минг 671 нафар ва Самарқанд вилояти 10 минг 264 нафар кўчиб келувчи билан қайд этилган.

Кўчиб кетиш ҳолатлари бўйича ҳам Тошкент шаҳри етакчилик қилди. Пойтахтдан 50 минг 355 нафар кўчиб кетган бўлиб, уларнинг 492 нафари хорижга чиққан. Шунингдек, Тошкент вилоятидан 18 минг 878 нафар, Қашқадарё вилоятидан 14 минг 431 нафар ва Самарқанд вилоятидан 13 минг 215 нафар бошқа ҳудудларга ёки хорижга кўчиб кетган.

Сўнгги беш йилда хорижга кўчиб кетувчилар сони доимий равишда хориждан кўчиб келувчилардан юқори бўлиб қолмоқда. 2023 йилда хорижга кўчиб кетиш энг юқори — 9 минг 4 нафарга етган.