Тошкент шаҳрида жамоат транспорти ҳаракатига устуворлик бериш мақсадида автобуслар учун мўлжалланган «А» тоифасидаги алоҳида йўлакларни ташкил этиш ишлари давом этмоқда.

Хусусан, «Magic City» ҳудудидаги Фурқат кўчасидан Халқлар дўстлиги саройи яқинидаги Ислом Каримов кўчасигача бўлган йўл қисмида «А» йўлаги учун махсус чизиқлар чизилди. Шунингдек, ушбу йўлакларни умумий транспорт оқимидан ажратиш учун делиниаторлар ўрнатиш ишлари бошланди.

Делиниатор — бу йўлда ҳаракат йўлакларини бир-биридан ажратиб турувчи махсус пластик ёки резина тўсиқ элементларидир.

Мутахассисларнинг таъкидлашича, бундай ечим автобуслар ҳаракат тезлигини ошириш, қатновдаги кечикишларни камайтириш ҳамда жамоат транспорти жадвалининг барқарорлигини таъминлашга хизмат қилади.

Айтилишича, жаҳоннинг кўплаб йирик шаҳарлари, жумладан АҚШ, Испания, Буюк Британия, Сингапур, Австралия ва Боку шаҳрида автобуслар учун ажратилган алоҳида йўлаклар транспорт тизими самарадорлигини оширишнинг муҳим воситаси сифатида қўлланиб келинмоқда.

Делиниаторлар эса автобус йўлакларига бошқа транспорт воситаларининг кириб кетишини камайтириб, йўл ҳаракати тартибини яхшилашга ёрдам беради.

Маълум қилинишича, жорий йил давомида Тошкентнинг 30 дан ортиқ кўчасида «А» тоифасидаги алоҳида йўлакларни ташкил этиш режалаштирилган. Мазкур йўналишларда делиниаторлар ва жамоат транспорти самарадорлигини оширишга қаратилган бошқа инфратузилма элементлари ҳам босқичма-босқич жорий этилади.