Рақамли ҳукумат фуқароларга уй қуришда ҳужжатларни расмийлаштириш ҳамда қурилиш ишларини амалга ошириш тартибини эслатиб ўтди.

Маълум қилинишича, аввало лицензияга эга лойиҳа ташкилотида уй лойиҳасини тайёрлаш лозим. Шундан сўнг лойиҳа my.gov.uz портали орқали тегишли тартибда келишилиб, қурилиш ишларини бошлаш мумкин. Қурилиш якунлангач эса объектдан фойдаланишга рухсатнома ҳам электрон тарзда олинади.

Қайд этилишича, агар уй икки қаватдан ошмаса, баландлиги 12 метрдан ва умумий майдони 500 квадрат метрдан катта бўлмаса, фуқаро лицензияга эга лойиҳа ташкилотига мурожаат қилиб лойиҳа тайёрлатиши мумкин. Кейинчалик лойиҳа Қурилиш ва уй-жой коммунал хўжалиги бош бошқармаси билан келишилгач, қурилиш ишлари бошланади.

Мутасаддилар уй айнан тасдиқланган лойиҳа асосида қурилиши кераклигини таъкидлади. Акс ҳолда, фойдаланишга рухсатнома олиш жараёнида муаммолар юзага келиши мумкин. Чунки якуний босқичда лойиҳа ташкилотининг хулосаси ҳамда ваколатли органларнинг жойига чиқиб ўтказадиган ўрганиш натижалари талаб этилади.

Шунингдек, фуқаролар электрон хизматлар орқали қурувчи ташкилотнинг ишончлилигини текшириш, кўчмас мулкнинг бузилиш (снос) ҳудудига тушган-тушмаганини аниқлаш, уй-жойни QR-код орқали текшириш, яшаш манзили бўйича рўйхатдан ўтиш, коммунал ҳисобрақамлар ва қурилиш объектлари ҳақида маълумот олиш имкониятига эга.

Масъуллар ҳужжатларсиз қурилган объектлар қонунчиликка мувофиқ жаримага сабаб бўлиши, айрим ҳолларда эса буздирилиши мумкинлигини эслатди. Лицензияга эга лойиҳа ташкилотлари рўйхати билан shaffofxarid.uz платформаси орқали ҳам танишиш мумкин.