Ўзбекистон миллий терма жамоаси бош мураббийи Фабио Каннаваро Нидерландияга қарши ўртоқлик учрашувидан сўнг ўйин ҳақида ўз фикрларини билдириб ўтди.

«Менимча, биз кўплаб ижобий жиҳатларни кўрсата олдик. Ҳисоб 1:0 бўлганидан кейин ҳам майдондаги тартиб ва “линия”ни йўқотмадик. Жамоа бўлиб ҳаракат қилишда давом этдик ва охиригача курашдик.

Бундай даражадаги миллий жамоаларга қарши ўйнаш осон эмас. Бироқ жамоам ўйинида кўплаб ижобий жиҳатларни кўрдим.

Бизга айнан шундай ўйинлар керак. Чунки бундай рақибларга қарши майдонга тушганингизда доимо ниманидир ўрганасиз ва тажриба орттирасиз», — деди Каннаваро.

Умуман олганда, мураббий учрашувдан мамнунлигини билдирди.

«Футболни хатоларсиз ўйнаб бўлмайди. Бу мутлақо нормал ҳолат. Бизнинг вазифамиз футболчиларга шундай хатолар сонини имкони қадар камайтиришда ёрдам беришдир.

Лекин ростини айтсам, мен ҳимоядаги хатолардан кўра ижобий жиҳатларни кўпроқ кўрдим», — дея таъкидлади бош мураббий.

Италиялик мутахассис футболчиларнинг жисмоний ҳолатига ҳам тўхталиб ўтди. Унинг айтишича, жамоа тайёргарликни бир ойдан кўпроқ вақт олдин бошлаган, легионер футболчилар эса жамоага кейинроқ қўшилган.

«Шунга қарамай, жисмоний тайёргарлик борасида яхши иш олиб борганимизга ишонаман. Албатта, айрим футболчилар билан боғлиқ ҳали ҳал этишимиз керак бўлган масалалар ҳам бор ва биз улар устида ишлашда давом этамиз», — деди Каннаваро.

Эслатиб ўтамиз, 8 июнь куни Ўзбекистон Нидерландияга қарши ўртоқлик учрашуви ўтказиб, 2:1 ҳисобида мағлубиятга учради. Рақиб дарвозасига ягона голни қўшимча вақтда Игорь Сергеев киритди.