Футбол бўйича жаҳон чемпионати нафақат Испаниянинг ғалабаси, балки финал ўйинининг иккинчи иштирокчиси Аргентина терма жамоасига қарши мисли кўрилмаган норозилик билан ҳам ёдда қолмоқда.

Аргентина термаси жамоасини ФИФА мусобақаларидан четлатишга доир петиция рекорд даражада – 23,3 миллионта овоз йиғди.

Петиция муаллифлари эътиборсизлик учун ФИФАдан ёзғирган бўлса, “ғирром” Аргентинани мағлуб этгани учун Испания терма жамоасига миннатдорлик билдирган.

Аввал хабар берганимиздек, кўп миллион сонли мухлислар Халқаро футбол федерациясини (ФИФА) Аргентинанинг тарафини олишда айбламоқда. Хусусан, Лотин Америкаси давлатининг Швейцария ҳамда Мисрга қарши ўйинлардаги ғалабалари шубҳа уйғотган.

Петиция муаллифлари ФИФА раҳбарияти ва ҳакамлар жамоаси машҳур футболчи Лионел Мессига ён босаётганини ҳам айтган.

Хабарингиз бор, 19 июль кунги финал учрашувида Испания терма жамоаси Аргентинани қўшимча бўлимларда 1:0 ҳисобида мағлуб этиб, тарихида иккинчи бор жаҳон чемпионига айланди.

Финал ўйинидан кейин ҳам Месси жамоадошлари можароли ҳолатни юзага келтирди. Хусусан, футболчилар Науэль Молина, Леандро Паредес ва Тьяго Альмада ҳамда Аргентина термаси бош мураббийи ёрдамчиси Роберто Аяла Испания футболчилар билан тўқнашув содир этган. Ижтимоий тармоқларда тарқалган видеолавҳаларда аргентиналик футболчилар Испания термаси вакилларига куч ишлатганини кўриш мумкин.

Euronews телеканали хабар беришича, кучли норозилик ва тармоқлардаги босим ортидан ФИФА Аргентина футболчиларининг хатти-ҳаракати текширилишини маълум қилди. ФИФА тайинлаган ахлоқ масалалари бўйича прокурор тўқнашув юзасидан хулоса бериши кутилмоқда.

Аргентина вакилларининг ҳаракатлари хулқ-атвор қоидаларининг бузилиши ва ФИФА талабларига бўйсунмаслик деб баҳоланиши мумкин.

Аргентина футболчилари ЖЧ–2026 кунларида ирқчилик деб аталаётган ҳолатларга ҳам аралашиб қолган. Англия термаси устидан ғалабадан кейин футболчиларнинг майдонда “Las Malvinas son Argentinas” (“Фолкленд ороллари Аргентинага тегишли”) деган сиёсий шиорни кўтариб чиққани эпизоди ҳам алоҳида тафтиш этилиши кутилмоқда.