АҚШ Давлат котиби Марко Рубио киберфирибгарлик ва жинсий шантаж каби кибержиноятлар сабаб айбланганлар ёки уларга алоқадор шахсларга қаратилган янги виза чекловларини эълон қилди.

Бу ҳақдаги маълумотлар АҚШ Давлат департаменти сайтида пайдо бўлди. Кириш визаларини беришни тақиқлаш нафақат бундай жиноятларни содир этганликда гумон қилинаётган шахсларга, балки уларнинг яқинларига ҳам тегишли бўлади.

​Гарчи янги сиёсат техник жиҳатдан ҳаммага тааллуқли бўлса-да, Рубио асосий мақсад ким бўлишини аниқ айтди.

«Кўпинча Хитой трансмиллий жиноий ташкилотлари томонидан мувофиқлаштирилган фирибгарлар 2024 йилнинг ўзида Америка фуқароларини камида 10 миллиард долларга алдаб, коррупция, пул ювиш ва одам савдосига кўмаклашган. Америкалик болалар ҳам оилаларни вайрон қилувчи ва болаларни келажагидан маҳрум қилувчи жинсий товламачилик схемаларида чет эллик жиноятчилар томонидан нишонга олинган», дейди у. 

​Июл ойи бошида АҚШда ўта сўл экстремистик қарашларни қўллаб-қувватловчи ташкилотларни «молиялаштирган,  рағбатлантирган ёки фаолиятини бошқа йўл билан қўллаган хорижликларга» нисбатан виза чекловлари киритилган эди.