АҚШ ва Эрон ўртасида дастлабки тинчлик келишуви бўйича меморандум келишиб олинди. Уни 19 июн куни Швейцарияда имзолаш режалаштирилмоқда.

Бу ҳақда АҚШ президенти Доналд Трамп ҳамда Покистон бош вазири Шаҳбоз Шариф маълум қилди.

Томонлар келишуви жангларни барча фронтларда, жумладан Ливанда ҳам тўхтатишни, шунингдек, Ҳўрмуз бўғозини қайта очишни назарда тутади.

Reuters агентлигига интервью берган эронлик расмийнинг айтишича, меморандум Эрон нефтига қўйилган санкцияларни юмшатиш, мамлакатнинг 25 миллиард долларлик музлатилган активларини озод қилиш, ядровий дастурни тўхтатиш ҳамда юқори бойитилган уран захираларини суюлтириш мажбуриятини ҳам ўз ичига олади.

Маълум қилинишича, меморандум имзолангандан кейин АҚШ ва Эрон яна 60 кун давомида энг баҳсли масалалар, жумладан Эрон ядровий дастурининг келажаги ва барча санкцияларни бекор қилиш бўйича музокараларни давом эттиради. Шу муддатдан сўнг якуний тинчлик келишувини имзолаш режалаштирилган.

Трамп ўзининг Truth Social тармоғида эълон қилган баёнотида келишув якунланганини маълум қилиб, Ҳўрмуз бўғозининг божсиз очилиши ва АҚШнинг денгиз блокадаси бекор қилинишини тасдиқлади.

«Бу улкан келишув бутун минтақага тинчлик ва хавфсизлик олиб келади. Кўплаб президентлар Эрон билан тинчлик ўрнатишга уринган, аммо муваффақият қозона олмаган. Энди эса минтақа етакчилари ҳақиқий тинчликка эришиш имкониятига эга бўлди», – деб ёзади Трамп.