Қатар, Миср, Покистон ва бошқа минтақавий воситачилар АҚШ ҳамда Эронга 10 кунлик ўт очишни тўхтатиш режасини таклиф қилди. Ташаббус ҳарбий ҳаракатларни вақтинча тўхтатиб, музокараларни қайта тиклашга қаратилган.

Axios маълумотига кўра, Дональд Трамп маъмурияти ушбу таклифни ўрганмоқда ва Исроилни дипломатик музокаралар имкониятини йўққа чиқариши мумкин бўлган ҳаракатлардан тийилишга чақирган. Бироқ Вашингтон музокаралар самарасиз якунланиши эҳтимолини ҳам ҳисобга олиб, Яқин Шарққа қўшимча ҳарбий кучлар юборишни давом эттирмоқда.

Нашрнинг ёзишича, Исроил армияси ҳам юқори жанговар шайлик ҳолатига келтирилган бўлиб, можарони кенг кўламли ҳарбий кампанияга айланиши эҳтимолига тайёргарлик кўрмоқда.

Маълумот учун, 8 июл куни Дональд Трамп Эроннинг Ҳўрмуз бўғозидаги тижорат кемаларига ҳужумларини важ қилиб, аввал амал қилган ўт очишни тўхтатиш тартиби бекор қилинганини эълон қилган эди. Шундан кейин АҚШ Эрон ҳудудига зарбалар бермоқда, Теҳрон эса Яқин Шарқдаги Америка объектларига жавоб ҳужумларини амалга оширмоқда.