АҚШ Давлат котиби Марко Рубио Вашингтон Халқаро жиноят суди (ХЖС) фаолиятига қарши кенг кўламли дипломатик кампания бошлашини эълон қилди.

Унинг айтишича, АҚШ маъмурияти бошқа давлатларни ҳам ХЖСдан чиқишга чақиришни режалаштирмоқда. Шунингдек, судга нисбатан янги санкциялар ва бошқа чеклов чоралари қўлланиши мумкин.

Марко Рубио The Wall Street Journal газетасидаги мақоласи ва X ижтимоий тармоғида эълон қилинган видеомурожаатида ХЖСни «АҚШ суверенитетига таҳдид» деб атади.

АҚШ Давлат департаментининг билдиришича, кампаниянинг асосий мақсади Халқаро жиноят судининг америкалик ҳарбийлар ва давлат амалдорларига нисбатан юрисдикция қўллаш имкониятини чеклаш ҳамда суд фаолиятини молиявий ва дипломатик жиҳатдан изоляция қилишдан иборат.

Шу муносабат билан Вашингтон ХЖСга аъзо давлатларни суддан чиқишга ва уни молиялаштиришни тўхтатишга чақиришни режалаштирмоқда.

Айни пайтда халқаро ҳуқуқшунослар мазкур ташаббусни танқид қилди. Human Rights Watch ташкилотининг собиқ раҳбари Кеннет Рот АҚШ маъмурияти бу орқали америкаликларни хорижда содир этилиши мумкин бўлган ҳарбий жиноятлар учун жавобгарликдан ҳимоя қилишга уринмоқда, деган фикрни билдирди.