Жаҳон чемпионати мухлислари Халқаро футбол федерациясини (FIFA) Аргентинага ён босишда айблаб, жамоани турнирдан четлатиш талаби билан петиция имзолашди.

Гап шундаки, Аргентина терма жамоаси чорак финалда Швейцарияга қарши майдонга тушиб, ғалабага эришди. Учрашув давомида швейцариялик ҳужумчи Брел Эмболо иккита сариқ карточка олиб, майдондан четлатилди. Дастлаб ҳакам огоҳлантиришни аргентиналик Леандро Паредесга берган бўлса, VAR текширувидан сўнг қарорини ўзгартирган.

Шунингдек, Аргентина ва Миср ўртасидаги 1/8 финал учрашувида ҳам VAR ёрдамида мисрликларнинг голи бекор қилингани мухлислар норозилигига сабаб бўлди.

Петиция муаллифлари FIFA ва ҳакамлар Лионел Месси ҳамда Аргентина терма жамоасига нисбатан холис эмаслигини таъкидлаб, жамоани жаҳон чемпионатидан четлатишни талаб қилмоқда.

«FIFA ва ҳакамлар Лионел Месси ҳамда Аргентина терма жамоасига нисбатан очиқчасига тарафкашлик қиляпти. Агар ғолиб аллақачон белгилаб қўйилган бўлса, қолган жамоалар нега мусобақалашиши керак? Аргентинани Жаҳон чемпионатидан четлаштиринг ва қолган барча жамоаларга адолатли имконият беринг», — дейилган петиция изоҳида.

argentinaout.com сайтида жойлаштирилган петицияни ҳозирга қадар 5 млндан ортиқ киши имзолаган.

Таъкидлаш жоизки, ушбу петиция шунчаки мухлислар норозилигини ифодалайди, чемпионат натижаларига эса ҳеч қандай таъсир ўтказмайди.

Аргентина терма жамоаси ярим финалда 15 июл куни Атлантада Англия терма жамоасига қарши майдонга тушади.