Доналд Трампнинг махсус вакили Паоло Замполли ЖЧ-2026да Эрон ўрнига Италия терма жамоасини иштирокчилар сафига қўшишни сўраб ФИФАга мурожаат қилди. Бу ҳақда Financial Times нашри хабар берди.

Бу хабарни тасдиқлаган Замполли нашрга берган интервюсида Жанни Инфантинога шахсан мурожаат қилганини билдирди: «Мен асли италияликман, «Скуадра Адзурра»ни АҚШдаги турнирда кўриш — менинг орзуим».

Замполли ўз таклифини Италиянинг тўрт карра жаҳон чемпиони экани ва мундиалга йўлланма ололмаган жамоалар ичида ФИФА рейтингида энг юқори ўринда тургани билан асосламоқда.

Бироқ Эрон терма жамоаси яқинда баёнот бериб, турнирга қатъий тайёргарлик кўраётганини маълум қилди. Ҳозирда Эронга нисбатан ҳеч қандай расмий четлатиш чоралари йўқ. Эронликлар хавфсизлик нуқтаи назаридан ўз ўйинларини Канада ёки Мексикага кўчиришни сўрашган эди, аммо ФИФА бу сўровни рад этди.

Агар Эрон мусобақада қатнашишдан бош тортса, ФИФА низомлари бошқарув органига «истисно ҳуқуқи» асосида қарор қабул қилиш имконини беради. Ҳозирча ташкилот Замполлининг лоббичилик ҳаракатлари юзасидан изоҳ бермади. Аввалроқ Инфантино Эрон терма жамоасини қўллаб-қувватлаб, улар турнирда албатта иштирок этиши шартлигини таъкидлаган эди.

Манбаларга кўра, Замполлининг бу ташаббуси орасидан «ола мушук ўтган» Трамп ва Италия бош вазири Жоржа Мелонини яраштиришга уриниш бўлиши мумкин. Айтиш жоизки, АҚШ президенти ва Мелони ўртасидаги муносабатлар Эрон атрофидаги вазият ҳамда бошқа сиёсий ихтилофлар сабабли совуқлашган эди.

Ҳатто Кремл тарғиботчиси Владимир Соловьёв ҳам Мелонини Трампга «хиёнат» қилишда айблаб, ҳақорат қилганидан сўнг, Россия элчиси Италия ТИВга чақирилиб, унга норозилик билдирилганди.