Президентнинг «Аҳолига кўрсатилаётган давлат хизматларини такомиллаштириш ҳамда фуқаролар учун қўшимча қулайликлар яратиш чора-тадбирлари тўғрисида»ги ПҚ–265-сон қарори қабул қилинди.

Қарорга мувофиқ, 2027 йил 1 январдан кўчмас мулкка бўлган ҳуқуқларни давлат рўйхатидан ўтказиш соҳасида бир қатор янги тартиблар жорий этилади.

Жумладан, мулкдор кўчмас мулкни белгиланган муддатда давлат рўйхатидан ўтказиш учун мурожаат қилмаган тақдирда, унга нисбатан маъмурий жавобгарлик чораси қўлланмайди. Бунинг ўрнига рўйхатдан ўтказиш муддати қанча кечиктирилганига қараб, оширилган ставкада давлат божи ундирилади.

Шунингдек, хусусий мулк ҳуқуқидаги турар жой мерос ёки яқин қариндошидан ҳадя тариқасида олинган бўлса, уни сотишдан олинган даромадни солиқдан озод қилиш учун белгиланган муддат энди мерос қолдирувчи ёки ҳадя қилувчининг мазкур уйга бўлган мулк ҳуқуқи давлат рўйхатидан ўтказилган санадан бошлаб ҳисобланади.

Яна бир муҳим янгиликка кўра, тақиқ ёки хатлов қўйилган турар жойга ҳам гаровга олувчининг розилигисиз яшаш жойи бўйича рўйхатдан ўтишга рухсат берилади. Бироқ рўйхатдан ўтаётган шахс мулкдор ёки ваколатли орган мурожаат қилган тақдирда, унинг рўйхатдан ўтганлиги бекор қилинишига олдиндан розилик билдириши шарт.

Мазкур ўзгаришлар давлат хизматларини соддалаштириш, аҳоли учун ортиқча оворагарчиликларни камайтириш ҳамда мулкий муносабатларни янада такомиллаштиришга қаратилган.