АҚШда ўзбек хонандаси Юлдуз Усмонованинг 9 май куни Брайтон-Бичда режалаштирилган концерти атрофида баҳслар кучаймоқда. Ню-Йорк штатидаги қатор сиёсатчилар унинг чиқишига қарши кампания бошлади.

Хусусан, Нассо округи раҳбари ва губернаторликка номзод Брюс Блейкман ҳамда штат Ассамблеяси депутатлари Майкл Новахов ва Алек Брук-Красни концертни бекор қилишни талаб қилмоқда. Улар хонандани антисемитизмда айблаяпти.

Новаховнинг билдиришича, улар Усмоновадан яҳудийларга нисбатан билдирган фикрларини қайтиб олиши ва узр сўраб чиққан видеосини ижтимоий тармоқдаги саҳифаларига жойлаши учун бир ҳафта муддат берган. Бироқ у буни амалга оширмаган ва юқоридаги талабни рад этган.

Фаоллар, шу муносабат билан АҚШ Давлат котиби Марко Рубиога унга берилган барча АҚШ визаларини қайтариб олиш ва бекор қилишни сўраб хат йўллаган.

Маълумотларга кўра, 4 май куни Ню-Йоркда ушбу масала юзасидан матбуот анжумани ўтказилиши ҳам режалаштирилган.

Ҳозирча, хонанданинг расмий муносабати очиқ манбаларда эълон қилинмаган.