Президент Шавкат Мирзиёев раислигида ўтган видеоселектор йиғилишида энергетика тизимидаги бошқарув муаммолари кескин танқид қилинди. Йиғилишда тизимда аниқланган камчиликлар учун Энергетика вазири ҳамда «Ҳудудий электр тармоқлари» раҳбари лавозимидан озод этилгани маълум қилинди.

Давлат раҳбари Сурхондарё вилоятида қурилаётган буғ-газ электр станцияси учун жой нотўғри танланганини танқид қилди. Бунинг натижасида станцияга газ етказиб бериш учун қўшимча 300 миллион доллар сарфлашга тўғри келаётгани қайд этилди.

Шунингдек, ташаббускор билан тузилган шартнома шартлари етарлича пухта ўрганилмагани қўшимча харажатлар юзага келишига сабаб бўлиши мумкинлиги таъкидланди. Масъулларга шартнома шартларини қайта кўриб чиқиш топширилди.

Йиғилишда «Миллий электр тармоқлари», «Иссиқлик электр станциялари», «Трансгаз» ва «Ҳудудгаз» раҳбарларига йил якунигача синов муддати белгиланди. Агар белгиланган вазифалар ижросида натижа бўлмаса, улар ҳам лавозимидан озод этилиши ҳақида огоҳлантирилди.

Президент янги Энергетика вазири Шерзод Хўжаев, «Ҳудудий электр тармоқлари»нинг янги раҳбари Сардор Исақулов ҳамда Энергия инспекциясининг янги бошлиғи Аҳад Исоқжонов бугундан бошлаб мутлақо янги иш услубини жорий қилиши шартлигини таъкидлади.

Давлат раҳбари ҳокимларга ҳам мурожаат қилиб, энергетика соҳасидаги муаммоларга бефарқ қараш мумкин эмаслигини билдирди. «Ҳокимлар ҳам «Бу энергетикларнинг иши» деб хотиржам ўтиришга ҳаққи йўқ. Сўров қаттиқ бўлади», — деди Президент.

Йиғилишда тармоқдаги техник ва тижорат йўқотишлари ҳам таҳлил қилинди. Маълум қилинишича, электр энергиясидаги йўқотишлар 17,2 фоизни ташкил этмоқда. Жорий йилнинг олти ойида 4,8 миллиард киловатт-соат электр энергияси йўқотилган.

Андижон шаҳри, Асака, Янгиобод, Косон, Кўкдала, Бойсун, Олтинсой, Қўштепа, Тошлоқ, Қўшработ ва Самарқанд туманларида йўқотишлар 25 фоиздан юқори экани қайд этилди.

Шунингдек, АСКУЭ ва АСКУГ тизимлари жорий этилганига тўрт йилдан ошган бўлса-да, аҳоли хонадонларидаги 300 мингта газ ва 234 мингта электр ҳисоблагич тармоққа маълумот узатмаётгани танқид қилинди. Бу айрим ҳудудларда дебитор қарздорликнинг камайиш ўрнига ошиб боришига сабаб бўлаётгани, энергия самарадорлиги эса фақат қуёш панеллари ўрнатиш билан чекланмаслиги таъкидланди.