Пойтахтимизда юқори савияда бўлиб ўтган бешинчи Тошкент халқаро инвестиция форуми мамлакат иқтисодиёти учун нафақат йирик келишувлар, балки рақамли технологияларнинг намойиш майдонига ҳам айланди.

Форум доирасида ташкил этилган халқаро кўргазмада Рақамли ҳукумат лойиҳаларини бошқариш маркази ўзининг инновацион стенди билан иштирок этди. Марказ мутахассислари томонидан тақдим этилган рақамли экотизим ва янги Инвестицион портал чет эллик бизнес вакилларида катта қизиқиш уйғотди.

Кўргазмага ташриф буюрган хорижлик инвесторлар ва йирик халқаро корпорациялар вакиллари Марказ стендида Ўзбекистоннинг рақамли инфратузилмаси билан яқиндан танишиш имконига эга бўлдилар. Айтиш жоизки, маълумотларни сақлаш ва қайта ишлаш хавфсизлиги, киберҳимоя ҳамда тизимларнинг барқарорлиги халқаро сармоядорлар учун энг муҳим кафолатлардан биридир.

Айнан шу жиҳати давлат ва бизнес ўртасидаги мулоқотни тўлиқ рақамлаштирган, юзлаб хизматларни масофавий шаклга келтирган тизим сифатида алоҳида эътироф этилди.

Марказнинг етакчи мутахассислари ҳар бир хорижлик меҳмонга ушбу қулай платформалардан амалиётда қай тартибда фойдаланиш, тизимларнинг ишлаш алгоритмлари ва улар тақдим этадиган иқтисодий самарадорлик хусусида батафсил маълумот беришди.

Кўргазманинг энг қизғин муҳокама қилинган ва хорижлик сармоядорларни ўзига жалб этган асосий янгилиги — «Инвестицион портал» бўлди.

Марказнинг етакчи мутахассислари меҳмонларга портал орқали Ўзбекистонга инвестиция жалб қилиш учун қандай йўл тутиш лозимлигини, компания номини заҳиралашдан тортиб, МЧЖ ёки қўшма корхона очиш, лицензиялар олиш, ер майдонларини аукциондан сотиб олиш ва солиқ масалаларини масофадан ҳал этиш жараёнлари қай тартибда амалга оширилишини қадамма-қадам тушунтириб беришди.

Электр, газ, сув каби инфратузилма тармоқларига уланишдан тортиб, эркин иқтисодий зоналардан жой ажратилишигача бўлган барча жараёнларнинг рақамли форматга ўтказилгани Ўзбекистоннинг халқаро бизнес рейтинглардаги ўрнини кескин юқорига кўтариши шубҳасиз.

Бешинчи Тошкент халқаро инвестиция форуми доирасида Рақамли ҳукумат лойиҳаларини бошқариш маркази нафақат тайёр маҳсулотни намойиш этди, балки Ўзбекистоннинг замонавий тенденцияларга мослаша олаётган, очиқ ва хавфсиз рақамли давлатга айланганини амалда исботлади. Кўргазма майдонидаги бевосита мулоқотлар ва хорижликларнинг юқори қизиқиши яқин истиқболда мамлакатимизга рақамли каналлар орқали янги капитал оқими кириб келишини таъминлайди.