АҚШ президенти Дональд Трамп Буюк Британиянинг BBC корпорациясига қарши 5 миллиард доллар миқдорида суд даъво аризаси киритди. У корпорацияни ўз нутқини атайлаб монтаж қилиш орқали уни обрўсизлантирганликда, яъни туҳмат ва қонунларни бузишда айбламоқда.

Даъвога сабаб бўлган ҳолат BBC’нинг «Panorama» дастурида 2024 йил октябрда эфирга узатилган сюжет билан боғлиқ. Унда Дональд Трампнинг 2021 йил 6 январь – Капитолий штурми кунида сўзлаган нутқининг икки алоҳида қисми бир-бирига улаб кўрсатилган.

Натижада томошабинда Трамп гўёки тўғридан-тўғри тартибсизлик ва зўравонликка чақирган деган таассурот пайдо бўлган. Трамп эса айнан шу монтаж унинг сўзларининг мазмунини бузганини таъкидламоқда.

Даъво киритилишидан олдин BBC ҳуқуқшунослари Трамп томонига расмий жавоб йўллаган. Унда, жумладан, монтажда ёмон ният бўлмагани, дастур Трампга реал зарар етказмагани, чунки у кейинчалик қайта президент этиб сайлангани ҳамда BBC’нинг мазкур дастурни АҚШ ҳудудида тарқатиш ҳуқуқи бўлмагани айтилган.

Шунингдек, корпорация ўзини ҳимоя қилар экан, даъво АҚШ судларида кўриб чиқилиши мумкинлиги ҳам баҳсли эканини билдиради.

2025 йил ноябрида BBC’нинг ички ҳужжати сизиб чиқиб, жамоатчилик орасида корпорация журналистик холислик тамойилларини бузгани ҳақида жиддий айбловлар пайдо бўлди. Бу айбловлар орасида айнан Трамп нутқининг монтаж қилиниши ҳам бор эди.

Оқибатда 11 ноябрь куни BBC бош директори Тим Дэйви ва янгиликлар бўлими раҳбари Дебора Тернесс истеъфога чиқди. Орқасидан BBC расман узр сўраб, монтажда хатога йўл қўйилганини тан олди.

Агар суд Трамп фойдасига ҳал бўлса, бу иш халқаро оммавий ахборот воситалари учун ҳам жиддий прецедентга айланиши мумкин.