Аргентина терма жамоаси сардори Лионел Месси 2026 йилги Жаҳон чемпионати финалидан сўнг миллий жамоа сафидаги фаолиятини якунлашини маълум қилди. Бу ҳақда журналист Эрнан Кастилё X ижтимоий тармоғидаги саҳифасида ёзди.

Унинг сўзларига кўра, Месси финал учрашувидан кейин кийиниш хонасида жамоадошларига мурожаат қилган.

«Кийиниш хонасидаги нутқи жуда таъсирли бўлди. У бу Аргентина терма жамоаси сафидаги сўнгги учрашуви бўлганини айтди», — деб ёзган журналист.

20 июлга ўтар кечаси Испания терма жамоаси жаҳон чемпионати финалида Аргентинани қўшимча бўлимларда 1:0 ҳисобида мағлуб этди.

Месси турнир давомида 8 та гол уриб, 10 та гол муаллифи бўлган франциялик Килиан Мбаппедан кейин мусобақанинг иккинчи энг яхши тўпурарига айланди.

Лионел Месси Аргентина терма жамоаси сафида жами 207 та учрашувда майдонга тушиб, 125 та гол урган. У миллий жамоа билан 2021 ва 2024 йилларда Америка кубоги, 2022 йилда Жаҳон чемпионати ғолибига айланган, шунингдек, 2014 ва 2026 йилги мундиалларда кумуш медалларни қўлга киритган.