Қирғизистон президенти Садир Жапаров мамлакат қонунчилигига ўзгартиришлар киритишни ва болалар ва аёлларга нисбатан зўравонлик жиноятлари учун ўлим жазосини қайтаришни таклиф қилди. Бу ҳақда унинг матбуот котиби Асқат Алагозов Facebookда маълум қилди.

Ташаббусга 17 ёшли қизнинг ўлдирилиши сабаб бўлган.

«Вояга етмаган қизнинг ўта шафқатсизлик билан ўлдирилиши бўйича иш давлат раҳбарининг шахсий назорати остида. Президент администрацияси Ҳуқуқий таъминот бошқармаси бошлиғига қонунчиликка болалар, қизлар ва аёлларга қарши жиноятлар учун жавобгарликни юқори даражада кучайтиришни назарда тутувчи ўзгартиришлар тайёрлашни топширди», — деб ёзди Асқат Алагозов

Таъкидланишича, президент Жапаров, айниқса, болалар ва аёлларга қарши жиноятлар жазосиз қолмаслиги керак деб ҳисоблайди.

Маълумот учун: шу йилнинг 27 сентябр куни Иссиқкўл вилоятида яшовчи 17 ёшли қиз бедарак йўқолган: у қўшни қишлоққа бориб, алоқага чиқмай қўйган. Унинг жасади икки кундан кейин дарада топилди. Тез орада гумонланувчи — Бишкекда яшовчи 41 ёшли шахс қўлга олинди. У қизни ўғирлаб, кейин зўрлаб ўлдирганига иқрор бўлди. Унга қўлланилган модда бўйича 12 йилдан умрбодгача қамоқ жазосига ҳукм қилиниши мумкин.

1988 йилда Қирғизистонда ўлим жазосига икки йиллик мораторий жорий этилган ва кейин бир неча бор узайтирилган. 2007 йилда ўлим жазосини қўллаш республика Конституциясидан чиқариб ташланган.

Бундай муҳокамалар ўзбек жамоатчилиги учун ҳам бегона эмас.

Аввал хабар берганимиздек, ўтган йили «Миллий тикланиш» партияси раҳбари Алишер Қодиров Тошкент шаҳри Яшнобод туманида содир бўлган ваҳший қотиллик ортидан ўлим жазосини тиклашни таклиф қилган эди.

Олий Мажлис Қонунчилик палатаси спикери ўринбосари Одилжон Тожиев эса ушбу таклифга кескин эътироз билдириб, «ўлим жазосини тиклаш керак деганларга Конституция китобини совға қилиш»ни маслаҳат берганди.

Эслатиб ўтамиз, Ўзбекистон Республикасининг 2023 йил 1 майдан кучга кирган янги таҳрирдаги Конституцияси 25-моддасида ўлим жазоси тақиқланиши алоҳида қайд этилган.

Президент Шавкат Мирзиёев ҳам 2022 йилда «яшаш ҳуқуқи ҳар бир инсоннинг табиий ҳуқуқи бўлиб, унга бу ҳуқуқни давлат эмас, Яратганнинг ўзи ато этгани»ни таъкидлаб, мамлакат ушбу ўта жиддий масалада ҳеч қачон ортга қайтмаслигини айтганди.