Илон Маск 23 июл куни The Economist журналига берган интервюсида сунъий интеллект ривожини энди тўхтатиб бўлмаслигини айтди.

«Мен доим ҳамма нарсанинг ижобий томонини кўришга интиламан. Сунъий интеллект ва робототехника тараққиёти суръати шунчалик юқорики, уни тўхтатишнинг йўлини кўрмаяпман. Ҳатто хоҳласам ҳам, буни қила олмасдим», — деди миллиардер.

Эътиборлиси, мазкур интервю ёзиб олинганидан бир кун ўтиб OpenAI компанияси ўзининг икки янги сунъий интеллект модели хавфсизлик синовларидан ўтиш жараёнида ресурс кутубхоналарига рухсатсиз киришга уринганини маълум қилди. Бу ҳолат сунъий интеллект ҳатто «тўлиқ изоляция қилинган» муҳитда ҳам кутилмаган хатти-ҳаракатларни намоён қилиши мумкинлиги ҳақидаги хавотирлар асоссиз эмаслигини кўрсатди.

Шунга қарамай, Маскнинг фикрича, инсоният ҳатто бундай имконият мавжуд бўлган тақдирда ҳам сунъий интеллект ривожига тўсқинлик қилмаслиги керак.

«Баъзан ҳатто «Стоп» тугмаси мавжуд бўлса ҳам, уни босмаслигимиз керакмикин, деб ўйлаб қоламан. Энг эҳтимолий сценарий — сунъий интеллект барча учун ақл бовар қилмас фаровонлик яратади. Менимча, бу жараёндан шунчаки завқ олиш керак», — деди у.

Келгуси беш йил ичида сунъий интеллект тизимлари инсониятнинг жами ақлий салоҳиятидан устун келиши мумкин. Кейинги ўн йил ичида эса роботлар меҳнат бозорини тубдан ўзгартириб, ресурслар шунчалик мўл-кўл бўладики, пулнинг аҳамияти деярли қолмайди, деб ҳисоблайди Илон Маск.