Poytaxtimiz madaniy hayotida muhim voqea yuz berdi, rekonstruksiyadan so‘ng O‘zbekiston davlat milliy qo‘g‘irchoq teatri o‘z eshiklarini keng ochdi. Teatrga tashrif buyurgan Saida Mirziyoyeva mazkur maskandagi o‘zgarishlar hamda bolalar tarbiyasidagi teatr san’atining o‘rni haqida fikrlari bilan o‘rtoqlashdi.

​«Qo‘g‘irchoq teatri san’ati an’analarini asrab qolish men uchun alohida ahamiyatga ega. Zero, qo‘g‘irchoq bolalar bilan muloqotda hamsha eng yaxshi vositachi bo‘lib qoladi. Ular bolalar tushunadigan tilda erkinlik, mas’uliyat, matonat va do‘stlik kabi muhim tushunchalar haqida so‘zlashishga yordam beradi», — deya ta’kidladi Saida Mirziyoyeva.

​Rekonstruksiyaning birinchi bosqichi yakunlanishi bilan teatr hayotiga yana jon kirganini sezish qiyin emas. Bugun bu yerda yana bolalarning shodon kulgisi yangrab, ota-onalar o‘z farzandlari bilan san’at olamiga g‘arq bo‘lmoqda.

Teatrning qayta tiklanishida eng muhim jihat – uning tarixiy qiyofasi va ruhini saqlab qolishga qaratildi. Mutaxassislar binoning o‘ziga xos jihatlarini asl holida qayta jonlantirishdi. Jumladan:

• ​«Ertaklar shaharchasi» o‘zgarishsiz qoldirildi;
• ​Zalning qadimiy cho‘yan eshiklari, noyob shisha plafonlar va mozaikalar restavratsiya qilindi;
• ​Peshtoq kompozitsiyalari hamda karnay chalayotgan sozandalar siymosi to‘liq ta’mirlanib, teatrning o‘tmishdagi hashamati tiklandi.

Saida Mirziyoyeva teatr repertuaridan o‘rin olgan, Vilgelm Gaufning mashhur asari asosida sahnalashtirilgan «Xalifa Laylak» spektaklini tomosha qildi. Ushbu asar inson irodasi va o‘zlikni anglashdek yuksak g‘oyalarni ilgari surishi bilan ahamiyatlidir.

Bugungi kunda Milliy qo‘g‘irchoq teatri shunchaki madaniyat maskani emas, balki avlodlar o‘rtasidagi bog‘liqlikni saqlovchi ma’naviy dargoh sifatida yanada muhim ahamiyat kasb etmoqda. Yangilangan teatr kichik tomoshabinlarni ertaklar olamidagi betakror sarguzashtlarga chorlab, ularning dunyoqarashini boyitishda davom etadi.