Буюк Британия Россияга қарши санкциялар рўйхатини кенгайтириб, унга 85 нафар жисмоний ва юридик шахсни киритди. Бу ҳақда Британия ҳукумати маълум қилди.

Янги чекловлар остига «Диалог» ННТ раҳбари Владимир Табак, «Росмолодёжь» раҳбари Григорий Гуров, «Юнармия» ҳаракати бошлиғи Владислав Головин ҳамда Ижтимоий лойиҳалаш агентлигининг 49 нафар ходими тушган. Улар орасида муаллифлар, таржимонлар ва видео-контент яратувчилар ҳам бор.

Санкциялар рўйхатига бир қатор ташкилотлар ҳам қўшилди.

Жумладан:
– Ижтимоий тадқиқотлар эксперт институти;
– Ёшлар муҳитини тармоқ мониторинги маркази;
– Интернетни ривожлантириш институти.

Лондон бу чораларни Россиянинг «ахборот уруши кампаниялари», шунингдек украиналик болаларни «мажбурий депортация қилиш ва мафкуравий таъсирга жалб этиш» билан боғламоқда. Баёнотда Арманистондаги сайловларга эҳтимолий аралашув ҳақидаги иддаолар ҳам тилга олинган.

Москва эса бу айбловларни рад этиб келмоқда. Россия расмийларига кўра, украиналик болалар жанговар ҳудудлардан хавфсизлик мақсадида олиб чиқилган. Кремл вакиллари Ғарбнинг бу мавзудаги баёнотларини сиёсийлаштирилган деб ҳисоблайди.