БМТнинг Инсон ҳуқуқлари бўйича Олий комиссари бошқармаси (OHCHR) Ғарбий Соҳилда вазият ёмонлашгани, исроиллик кўчманчилар томонидан содир этилган зўравонлик рекорд даражага етганини хабар қилди.

Бошқарма ҳисоб-китобларига кўра, 2026 йил бошидан 24 июлгача у ерда 76 фаластинлик ва битта исроиллик ҳалок бўлган, бир ҳафтадан камроқ вақт ичида эса яна саккиз фаластинлик ва иккита исроиллик вафот этган. 

OHCHR таъкидлашича, ҲАМАС гуруҳи Исроилга ҳужум қилган 2023 йилдан бери кўчманчилар томонидан фаластинликларга қилинган ҳужумлар сони барқарор равишда ошиб бормоқда. Ўтган йили кўчманчилар 1800 дан ортиқ ҳужум уюштиришган. 2026 йилнинг дастлабки ойларида бундай ҳодисалар сони ойига 190 тага етди ва умуман олганда йил давомида уларнинг сони 2000 дан ошиши мумкин. 

Ғарбий Соҳил Фаластин аҳолиси ва Исроил кўчманчилари ўртасида қизғин кураш ҳудудидир. БМТ маълумотларига кўра, у ерда зўравонликнинг кўпайиши «Исроил ҳукумати янги аҳоли пунктларини қуришни маъқуллашда давом этаётгани» сабабли содир бўлмоқда.

«Кўчманчилар ва Исроил хавфсизлик кучлари кўпинча биргаликда ҳаракат қилиб, маҳаллий жамоаларга ҳужум қилишган, оилаларга ҳужум қилишган, мулкни вайрон қилишган ва мусодара қилишган ҳамда масжидларни ёқиб юборишган», деди БМТнинг Инсон ҳуқуқлари бўйича олий комиссарлиги вакили Равина Шамдасани.