Altrata хусусий сармоя тадқиқот фирмаси маълумотларига кўра, дунё бўйлаб доллар миллиардерлари сони 2025 йилда 8,2 фоизга ошиб, рекорд даражадаги 3795 тага етди.

Бу ўсиш суръати сўнгги беш йил ичидаги энг тез бўлиб, ҳолатга сунъий интеллект ҳам жиддий таъсир кўрсатган. Компания ҳисоботига кўра, дунё миллиардерларининг умумий бойлиги 12,8 фоизга ўсиб, рекорд даражадаги 15,1 триллион долларга етди.

Ҳисоботга кўра, дунё бўйлаб 29 та ўта бой шахс (соф бойлиги 50 миллиард доллардан ортиқ) мавжуд. Уларнинг умумий бойлиги тахминан 4,1 триллион долларни ёки барча миллиардерлар бойлигининг 27 фоизини ташкил қилади. Таққослаш учун, 2017 йилда атиги 10 та ўта бой шахс бор эди, бу дунё миллиардерларининг умумий бойлигининг 7,2 фоизини ташкил этди.

Altrata тадқиқот ва таҳлил бўлими раҳбари Майя Имбергнинг сўзларига кўра, сунъий интеллект "бум"и миллиардерлар бойлигидаги тафовутнинг кенгайишига ҳисса қўшди. Технология акцияларининг ўсиши рекорд даражадаги бойликларга олиб келган бўлса-да, сунъий интеллект акциялари билан боғлиқ бойлик динамикаси жуда ўзгарувчан бўлиши мумкин, деб огоҳлантиради у.

Шимолий Америкадаги миллиардерлар сони 2025 йилда 11,6 фоизга ўсиб, бошқа минтақаларга қараганда тезроқ 1337 тага етди. Европада бу рақам 7,9 фоизга ўсиб, 1081 тага, Осиёда эса 6,5 фоизга ўсиб, 881 тага етди.