Литва Россиянинг Калининград эксклавидан қарийб 30 километр ғарбда қуриладиган «Гизай» подстанциясини турли ҳарбий ва гибрид таҳдидлардан ҳимоялаш чораларини режалаштирмоқда. Бу ҳақда «Litgrid» раҳбари Андриус Семескевичюс «Reuters»га маълум қилган.

Лойиҳада портловчи модда ортилган юк машинасига бардош берадиган тўсиқлар, эҳтимолий туннелларни аниқлайдиган сенсорлар ва трансформаторларни дрон ҳужумларидан ҳимоялайдиган махсус темир-бетон конструкциялар кўзда тутилган.

Подстанция 35 гектарлик майдонда жойлашади. Асосий ускуналарнинг бир қисми захира нусхалари билан таъминланади, айрим қурилмалар эса махсус темир-бетон қобиқлар ичига жойлаштирилади.

«Гизай» Болтиқбўйи давлатларини Полша орқали Европа Иттифоқининг электр тармоғи билан боғлайдиган «Harmony Link» тизимининг муҳим тугуни бўлади. Болтиқбўйи давлатлари ўтган йили Россия электр тармоғидан узилиб, Европа тизимига уланган эди.

«Litgrid» маълум қилишича, янги подстанция ҳарбий дронлар, жумладан, катта миқдорда портловчи модда олиб келиши мумкин бўлган «Shahed» туридаги аппаратлар таҳдиди ҳисобга олинган ҳолда лойиҳаланмоқда. Ускуналарни махсус конструкциялар ичида сунъий совитиш ҳам режалаштирилган.

Литва ва Полша ўртасида жойлашган Сувалки йўлаги Россия ва Беларус ўртасидаги ҳудуд бўлиб, НАТО доирасида узоқ вақтдан бери хавфсизлик нуқтаи назаридан муҳим ҳудуд сифатида қаралади. «Reuters» суҳбатлашган разведка манбалари минтақада Россия томонидан «байроқ остидаги» ҳужум уюштирилиши мумкинлигидан хавотир билдирди. Россия бундай алоқадорликни билдиргани ҳақида хабар берилмаган.

Литва янги подстанция харажатининг камида ярмини Европа Иттифоқидан қоплашни сўрашни режалаштирмоқда. Қўшимча хавфсизлик чоралари сабаб «Litgrid» лойиҳа қиймати аввалги ҳисоб-китобга нисбатан камида 48 млн еврога ошишини билдирган.

Литва энергетика вазири Лукас Савицкас қўшимча харажатлар фақат мамлакат зиммасига тушмаслиги кераклигини айтган. Полша ҳукумати вакили ҳам Россия билан чегарадош давлатлар хавфсизлик харажатларининг ортиши рақобатбардошликка таъсир қилмаслиги учун Европа Иттифоқи кўпроқ маблағ ажратиши кераклигини билдирган.

Ўтган йили Болтиқбўйи давлатлари ва Полша электр тармоғининг муҳим қисмларини ҳимоялаш учун Европа Иттифоқидан 382 млн евро сўраган, бироқ 112 млн евро ажратилган.