АҚШ президенти Доналд Трамп сунъий интеллект соҳасида фаолият юритувчи «Anthropic» компаниясини энди миллий хавфсизликка таҳдид деб ҳисобламаслигини маълум қилди. Бу ҳақда у «Axios» нашрига берган интервьюсида гапирган.

Трампдан «Anthropic» ёки унинг бош директори Дарио Амодеи миллий хавфсизлик учун хавф туғдирадими, деб сўралганда, у: «Ҳозир эмас, аммо бир ҳафта олдин шундай деб ўйлаган бўлишим мумкин», деган.

Президентнинг ушбу баёноти компания ва АҚШ маъмурияти ўртасидаги баҳслар фонида янгради. Ўтган ҳафта Трамп маъмурияти «Anthropic»дан унинг энг илғор сунъий интеллект моделлари — Fable 5 ва Mythos 5’га хорижий фуқаролар киришини чеклашни талаб қилган эди. Шундан сўнг компания мазкур моделларга барча фойдаланувчилар учун киришни вақтинча тўхтатган.

Ҳафта бошида «Anthropic»нинг юқори малакали техник мутахассислари АҚШ маъмурияти вакиллари билан учрашув ўтказиши режалаштирилгани хабар қилинган.

Трамп интервью давомида компания раҳбари Дарио Амодеи ҳукуматнинг экспорт назорати бўйича кўрсатмасига «жуда тез» ва «масъулият билан» жавоб қайтарганини таъкидлади.

Шу ҳафта Францияда бўлиб ўтган «G7» саммити доирасида Трамп ва бошқа давлат раҳбарлари технология соҳасидаги етакчилар, жумладан Амодеи билан ҳам учрашди.

Бироқ АҚШ президенти компанияга нисбатан янада қатъий чоралар қўллаш эҳтимолини ҳам бутунлай истисно қилмади. Хусусан, у «Мудофаа ишлаб чиқариш тўғрисида»ги қонун доирасидаги фавқулодда ваколатлардан фойдаланиш имконияти ҳақида сўралганда: «Менда кўплаб воситалардан фойдаланиш ваколати бор. Лекин бунга эҳтиёж туғилиш ёки тўғилмаслигини билмайман», деди.

«Anthropic» компанияси Трампнинг баёнотига муносабат билдириб, АҚШ маъмурияти билан ҳамкорлик давом этаётганини маълум қилди.

Компания вакили ҳукумат билан муаммони тезроқ ҳал қилиш бўйича ҳамкорликдан миннатдор эканини таъкидлади. Шунингдек, «Anthropic» муҳим инфратузилмаларни ҳимоя қилиш ва сунъий интеллект соҳасида АҚШ етакчилигини таъминлаш бўйича умумий мақсадларга содиқ қолишини билдирди.