Венгрия президенти Тамаш Шуйок бош вазир Петер Мадяр раҳбарлигидаги ҳукмрон «Тиса» партияси ташаббуси билан парламент томонидан қабул қилинган Конституцияга ўзгартиришни имзолади. Мазкур тузатиш унинг президентлик лавозимини тарк этишига ҳуқуқий асос яратади.

Президент бу ҳақда «Facebook»даги видеомурожаатида маълум қилиб, ҳуқуқий имкониятлари ва виждонини синчковлик билан баҳолагач, асосий қонунда белгиланган мажбуриятларини бажаришга қарор қилганини айтди.

Шу билан бирга, Шуйок парламент қарорини кескин танқид қилди. Унинг фикрича, ушбу тузатиш сиёсий ҳокимиятни суиистеъмол қилишнинг тарихда шармандали мисолларидан бири сифатида қолади ҳамда президент институти мувозанатни таъминловчи омил бўлиш хусусиятини йўқотади.

«Ўз эътиқоди ва ҳақиқатига содиқ инсон зўравонликка мойил бўлмайди, бошқаларни ҳақорат қилмайди ва қадр-қимматини камситмайди. Ҳар қандай шароитда ҳам инсонийликни, ҳақиқатни ва ўзига садоқатни сақлаб қолиш энг тўғри йўлдир. Бизни бирлаштирадиган қадриятларни асрайлик ва Венгрияни севайлик», — деди Шуйок.

13 июл куни Венгрия парламенти президентни лавозимидан четлатиш имконини берувчи Конституцияга ўзгартиришни маъқуллаган эди. Петер Мадяр ташаббусини 199 депутатдан 139 нафари қўллаб-қувватлади, олти депутат қарши овоз берди. Собиқ бош вазир Виктор Орбан бошчилигидаги «Фидес» партияси депутатлари эса овоз беришни бойкот қилди.

Венгрия қонунчилигига кўра, президентни оддий парламент овози билан лавозимидан четлатиш мумкин эмас. Бунинг учун Конституцияга ўзгартириш киритилиши талаб этилади. Парламентда сон жиҳатдан устунликка эга бўлган «Тиса» партияси ушбу ўзгартиришни қабул қилишга муваффақ бўлди.