Ўзбекистонда ишлаб чиқарилганига 30 йил ва ундан кўпроқ бўлган автомобил эгалари ҳар йили экологик компенсация тўлаши мумкин. Бу жамоатчилик муҳокамасига қўйилган «Эксплуатация муддати ўтган автомашиналарнинг утилизациясини ташкил этиш ва унинг компонентларини қайта ишлаш амалиётини йўлга қўйиш тўғрисида»ги қарор лойиҳасида кўзда тутилган.

Янги тартиб 2027 йил 1 январдан бошлаб амал қилиши кутилмоқда. Компенсация миқдори БҲМнинг 30 баробарини ташкил этиши мумкин.

Шунингдек, ҳужжатга кўра, қонунчиликда белгиланган тартибда «зарарли» экологик тоифага мансуб транспорт воситаларидан фойдаланиш, уларни қайта рўйхатга олиш тақиқланади ҳамда улар давлат рўйхатидан чиқарилади («антиквар» автомототранспорт воситалари бундан мустасно).

Қайд этилишича, эксплуатация муддати ўтган автомашиналарни утилизация қилиш ва уларнинг компонентларини қайта ишлаш тизимини қуйидаги босқичларда жорий этилади:

• биринчи босқичда (2026-йилдан бошлаб) — М1 тоифали транспорт воситалар (енгил автомобиллар) учун;
• иккинчи босқичда (2027-йилдан бошлаб) — М2, М3, N1, N2, N3 тоифали транспорт воситалар (микроавтобуслар, автобуслар ва юк автомобиллари) учун;
• учинчи босқичда (2030-йилдан бошлаб) — барча турдаги ғилдиракли транспорт воситалари учун.