Жаҳон бозорида олтин нархи АҚШ ва Эрон ўртасида Ҳўрмуз бўғозини очишга доир эҳтимолий келишув ҳақидаги хабарлар фонида ўсди.

25 май куни олтиннинг спот нархи бир унция учун 4 579 долларгача кўтарилиб, кунлик ўсиш 1,6 фоизни ташкил этди. Кейинчалик ўсиш суръати бироз секинлашиб, нарх 4 564 доллар атрофида шаклланди.

Bloomberg нашрининг қайд этишича, бозорда АҚШ ва Эрон ўртасидаги музокаралар натижасида Ҳўрмуз бўғозида кемалар ҳаракати қайта тикланиши мумкинлиги ҳақидаги кутилмалар инфляция хавотирларини бироз юмшатган.

The Washington Post хабарига кўра, Вашингтон ва Теҳрон 60 кунлик ўт очишни тўхтатиш ҳамда Ҳўрмуз бўғозини очишни назарда тутувчи дастлабки келишув устида иш олиб бормоқда.

Шу билан бирга, таҳлилчилар бозор ҳозирча эҳтиёткор позицияда қолаётганини таъкидламоқда. Мутахассислар фикрича, инвесторлар Эроннинг ҳақиқатан ҳам ҳамкорликка тайёр эканига оид аниқ далилларни кутмоқда.

Бундан ташқари, АҚШ Федерал захира тизими фоиз ставкаларини ошириши мумкинлиги ҳақидаги хабарлар ҳам олтин бозорига таъсир кўрсатмоқда.