Олий Мажлис Сенатининг 15-ялпи мажлисида «Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида»ги қонун кўриб чиқилиб, маъқулланди.

Қайд этилишича, кейинги йилларда аҳолининг уй-жойга бўлган ҳуқуқларини таъминлаш, жисмоний ва юридик шахслар томонидан қурилган кўчмас мулк объектларига бўлган ҳуқуқларни эътироф этиш бўйича тизимли ишлар амалга оширилмоқда.

Шу билан бирга, ўзбошимчалик билан эгаллаб олинган ер участкалари ва уларда қурилган биноларга бўлган ҳуқуқларни тан олиш жараёнларини янада тезлаштириш, ваколатли ташкилотлар масъулиятини ошириш ҳамда айрим тартибларни соддалаштириш зарурлиги таъкидланди.

Янги қонун билан ҳуқуқларни эътироф этишга оид ҳужжатларни кўриб чиқиш муддатлари қисқартирилади. Бу борадаги шикоятларни кўриб чиқиш тартиби такомиллаштирилади ҳамда фуқаролар учун қўшимча қулайликлар яратилади.

Шунингдек, қонунга кўра, ер участкаларига ижара ҳуқуқини эътироф этиш учун бир марталик тўловни бўлиб-бўлиб тўлаш тартиби жорий этилади.

Сенаторлар фикрича, мазкур ўзгаришлар фуқаролар ва тадбиркорларнинг кўчмас мулкка бўлган ҳуқуқларини расмийлаштиришдаги тўсиқларни бартараф этишга хизмат қилади.