Бир қарашда йўл-патрул хизмати инспекторларининг бу хатти-ҳаракатини кузатиб, ҳайрон қолдик. Нега улар китоб тарқатишмоқда?

Навоий вилояти Ички ишлар бошқармаси Жамоат хавфсизлик хизмати йўл ҳаракати хавфсизлиги бошқармаси ахборот хизмати раҳбари Фарруҳ Якубовнинг «Xabar.uz»га маълум қилишича, бу аҳоли ўртасида маданиятли ҳаракат иштирокчилари қатламини шакллантириш, улар билан самарали тарғибот ишларини олиб бориш мақсадида ўзига хос лойиҳа сифатида амалга оширилаётган экан. 

— Бундай профилактик лойиҳанинг фақат ҳайдовчилар эмас, ҳаракат оқими юқори бўлган, асосан, пиёдалар кўп кесиб ўтадиган ҳудудларда ҳам ташкиллаштирилаётгани диққатга сазовор. Лойиҳа давомида ҳаракатланиш давомида ўзини намунали тутган, амалдаги «Йўл ҳаракати қоидалари» талабларига риоя қилган, ўз мажбуриятларини аъло даражада адо этган пиёдалар бадиий асарлар билан сийланмоқда,—деди Фаррух Якубов.

Маълум бўлишича, китоблар мопед ва скутер ҳайдовчиларига ҳам «Ватанпарвар» автомактаби билан ҳамкорликда «А» тоифадаги ҳайдовчилик гувоҳномасини олишга доир тайёрланган махсус қўлланмалар тарқатилган. 

Мазкур лойиҳа Навоий вилояти бўйлаб давом этмоқда.