Адлия вазирлиги томонидан собиқ давлат хизматчиларини ишга қабул қилишда коррупцияга қарши ички назорат бўлинмасининг хулосасини олиш тартибини белгиловчи идоравий ҳужжат давлат рўйхатидан ўтказилди. Ҳужжат 2026 йил 8 июлда 3894-сон билан рўйхатга олинган.

Мазкур тартиб «Манфаатлар тўқнашуви тўғрисида»ги Қонун ижросини таъминлаш мақсадида қабул қилинган.

Қонунга мувофиқ, давлат органи ёки ташкилотида ишлаган шахс ишдан бўшаганидан кейин икки йил давомида ўзи назорат қилган ташкилотга ишга қабул қилинишидан олдин аввалги иш жойининг коррупцияга қарши ички назорат бўлинмасидан мажбурий хулоса олиниши шарт.

Назорат остида бўлган ташкилот собиқ давлат хизматчисини ишга қабул қилишни режалаштирса, кадрлар бўлими бир иш куни ичида коррупцияга қарши ички назорат бўлинмасига мурожаат қилади.

Ички назорат бўлинмаси қуйидаги уч турдаги хулосадан бирини беради:
ижобий — номзодни ишга қабул қилиш мумкин;
чекловли ижобий — белгиланган чекловлар билан ишга қабул қилинади;
салбий — ишга қабул қилиш рад этилади.

Белгиланган тартибга кўра, хулоса олинмаган ёки салбий хулоса берилган тақдирда номзодни ишга қабул қилишга йўл қўйилмайди.

Агар ички назорат бўлинмаси чекловли ижобий хулоса берса, ходимга бир қатор талаблар қўлланилади.

Хусусан, у уч ой давомида аввал назорат қилган ташкилотга оид қарорларни қабул қилиш жараёнида иштирок этмайди. Шунингдек, манфаатлар тўқнашувига олиб келиши мумкин бўлган вазифалари қайта тақсимланади ҳамда унинг фаолияти коррупцияга қарши ички назорат бўлинмаси томонидан мониторинг қилинади.

Бундан ташқари, собиқ давлат хизматчиси ички назорат бўлинмасининг хулосасидан норози бўлган тақдирда, юқори турувчи ташкилотга ёки Коррупцияга қарши курашиш агентлигига шикоят қилиш ҳуқуқига эга.