Адлия вазирлиги томонидан Қишлоқ хўжалиги корхоналари биржа савдолари орқали харид қилган дизел ёқилғиси қийматининг бир қисмини қоплаш учун субсидия ажратиш тартибини белгиловчи вақтинчалик низом давлат рўйхатидан ўтказилди.

Низомга мувофиқ, пахта ва буғдой етиштирувчи фермерлар 2026 йил 1 апрелдан 1 июлгача биржа савдолари орқали харид қилган дизел ёқилғиси нархи бир тоннаси учун 13 миллион сўмдан ошган тақдирда, ортиқча қийматнинг 2 миллион сўмгача бўлган қисми давлат томонидан субсидия сифатида қоплаб берилади.

Янги тартибнинг муҳим жиҳати шундаки, фермерлар субсидия олиш учун алоҳида ариза топширмайди. Маблағлар проактив, яъни автоматик тартибда ажратилади.

Субсидиядан фойдаланиш учун дизел ёқилғиси фақат биржа савдолари орқали харид қилинган бўлиши лозим. Шунингдек, фермернинг экин майдонлари ва экин турлари «Агропортал» ахборот тизимига киритилган бўлиши шарт.

Харид қилинган дизел ёқилғиси агротехнологик харитада белгиланган апрел–июн ойларидаги агротехник ишлар учун сарфланган бўлиши ҳам талаб этилади.

Субсидия миқдори «Агропортал» маълумотлари асосида автоматик ҳисобланади. Ҳисобланган маблағлар ваколатли агентлик томонидан фермернинг тижорат банкидаги махсус ҳисобварағига уч иш куни ичида ўтказилади.

Низомда техник носозликлар ёки маълумотлар алмашинувидаги узилишлар ҳам инобатга олинган. Агар фермер ҳақидаги маълумотлар агентликка етиб бормаса, у ёзма равишда ёки «Агропортал» орқали электрон шаклда мурожаат қилиш ҳуқуқига эга.