Испаниянинг Marca спорт нашри ФИФА президенти лавозимида Жанни Инфантинонинг ўрнини эгаллаши мумкин бўлган беш асосий номзод рўйхатини эълон қилди.

Рўйхатдан қуйидагилар ўрин олган:

• Носир ал-Хелайфий — «Пари Сен-Жермен» клуби президенти, Европа футбол клублари кенгаши (EFC) раиси;
• Виктор Монталяни — ФИФА вице-президенти, Шимолий ва Марказий Америка ҳамда Кариб ҳавзаси мамлакатлари футбол конфедерацияси (КОНКАКАФ) президенти;
• Александер Чеферин — УЕФА президенти;
• Шайх Салмон бин Иброҳим ал-Халифа — Осиё футбол конфедерацияси (ОФК) президенти;
• Патрис Мотсепе — Африка футбол конфедерацияси (CAF) президенти.

Нашр қайд этишича, Виктор Монталяни — энг эҳтимолий номзод. У ФИФА кенгаши вице-президенти сифатида ташкилотнинг ички фаолиятини яхши билади.

Президентликка номзодларни рўйхатдан ўтказишнинг сўнгги муддати — 2026 йил 18 ноябр. Номзодни фақат миллий футбол ассоциацияси илгари суриши мумкин. Бундан ташқари, у камида бешта миллий федерация қўллаб-қувватловига эга бўлиши лозим.

ФИФА президенти сайлови 2027 йил 18 март куни Марокаш пойтахти Работ шаҳрида ўтказилиши режалаштирилган.

Аввалроқ УЕФА ФИФА раҳбари Жанни Инфантинога нисбатан ишонч йўқолганини расман маълум қилган эди. Бунга Инфантинонинг жаҳон чемпионатларининг тижорат ҳуқуқларини сотиш режаси сабаб бўлган. Бу ташаббусни етакчи футбол конфедерациялари кескин рад этган.