Италиянинг Ўзбекистондаги собиқ элчиси Пьергабриэле Пападиа де Боттини ди Сант’Аньезе ва унинг ёрдамчиси Татьяна Тараканова Италиянинг Тошкентдаги элчихонаси орқали Шенген визаларини бериш тизимини бошқарганликда айбланмоқда. Бу ҳақда La Repubblica хабар берди.

Рим прокуратураси ва Молия гвардияси томонидан олиб борилган тергов Тошкентдаги элчихонада 2025 йилнинг январидан июлигача амал қилган ноқонуний тизимни фош қилди.

Бу тизим орқали Ўзбекистонда яшамайдиган ёки консулхонага шахсан келмаган Россия фуқароларига талаб қилинган ҳужжатларсиз 1 йилдан 3 йилгача бўлган узоқ муддатли туристик визалар берилган.

Қонуний тўлов 45-60 евро бўлишига қарамай, ариза берувчилардан ҳар бир виза учун 4 000 евродан 16 000 еврогача пул олинган.

Тизим Москвада жойлашган ва бир хил манзилда рўйхатдан ўтган учта туристик агентлик (Happy Travel, Visa4you ва Park Lane) орқали ишлаган.

Камида 95 нафар Россия фуқароси ушбу ноқонуний схема ёрдамида Шенген ҳудудига кириб келган.

2025 йил декабр ойида вазирлик текширувидан сўнг лавозимидан четлатилган Пападиа ўз ҳаракатларини пул зарурлиги билан изоҳлаб, терговчиларга: «Менга пул керак эди», деб айтган. Судя собиқ элчининг Россияга қочиб кетиш хавфи борлигини инобатга олиб, уни қамоққа олиш ҳақида қарор чиқарди. Шунингдек, унинг ёрдамчиси, асли россиялик бўлган ва Италия паспортига эга Татьяна Тараканова ҳам қўлга олинган.